Խորը հիասթափություն կապրեմ, եթե Հայրիկյանը «մահափորձից» հետո ընկնի երրորդ տեղը. սոցիոլոգ

Նախընտրական քարոզարշավը մոտենում է ավարտին: Ըստ էության, քարոզարշավ անցկացրին թեկնածուներից միայն չորսը՝ գործող նախագահ Սերժ Սարգսյանը, «Ժառանգություն» կուսակցության առաջնորդ Րաֆֆի Հովհաննիսյանը, «Ազատություն» կուսակցության նախագահ Հրանտ Բագրատյանը և ԱԻՄ առաջնորդ Պարույր Հայրիկյանը:

Սոցիոլոգ Կարեն Սարգսյանը «Առաջին լրատվական»-ի հետ զրույցում խոսելով թեկնածուների քարոզարշավների և այն մասին, թե նրանցից որն ինչ PR տեխնոլոգիա օգտագործեց, և դա ինչպես ազդեց հասարակության կարծիքի ձևավորման վրա, կարծիք հայտնեց, որ սկզբնապես, երբ հայտնի դարձավ, թե որ ուժերն են մասնակցության համար հայտ ներկայացրել, արդեն իսկ պարզ էր նրանց դասավորվածությունը, և քարոզարշավ անցկացնելու կարիք չկար էլ. «Միանգամայն պարզ է, որ առաջին տեղում է Սերժ Սարգսյանը, երկրորդում՝ Րաֆֆի Հովհաննիսյանը, երրորդում՝ Հրանտ Բագրատյանը, չորրորդում՝ Պարույր Հայրիկյանը»:

Սոցիոլոգի կարծիքով՝ Պարույր Հայրիկյանը քաղաքական գործիչ չէ և չի էլ լինելու, նա ռոմանտիկ է, և այդ ռոմանտիզմը վաղուց իրականություն չէ. «Մարդ, որը պատրաստվում է դառնալ նախագահ մի երկրում, որի տնտեսության 60-ից տոկոսից ավելին կախված է Ռուսաստանի Դաշնությունից, և կանգնում հայտարարություններ է անում, թե իրեն ռուսներն էին ուզում սպանել, դա մի քիչ ծիծաղելի է արդեն:

Ես հուսով եմ, որ Հայաստանում քվեարկելու իրավունք ունեցող քաղաքացիների 99 տոկոսը հասկանում է, որ Պարույր Հայրիկյանը չի կարող լինել երկրի նախագահ: Ես ակնկալում եմ, որ երրորդ տեղում կլինի Հրանտ Բագրատյանը, և խորը հիասթափություն կապրեմ, եթե Պարույր Հայրիկյանը տիր ու հրացանի մահափորձից հետո ընկնի, ասենք, երրորդ տեղը»:

Կարեն Սարգսյանի գնահատմամբ՝ քարոզարշավի իմաստը, նշանակությունը և բովանդակությունը բացակայում էին սկզբից ևեթ, գումարների իզուր վատնում է եղել բոլոր թեկնածուների համար. «Օրինակ՝ Րաֆֆի Հովհաննիսյանն, այսպես թե այնպես, ուներ իր վարկանիշը, երևի թե մի քիչ աճեց այս ընթացքում. այդքան բան»:

Անդրադառնալով թեկնածուների մինչ այսօր անցկացրած քարոզարշավներին՝ մեր զրուցակիցն ասաց, որ դրանք ընտրությունների արդյունքի վրա 0.1 տոկոսով կարող են ազդել. «Րաֆֆի Հովհաննիսյանն իրեն միշտ այդպես է պահում, ոչ մի տարօրինակ բան չկա, նա միշտ էլ, երբ մարդուն փողոցում տեսնում էր՝ կա՛մ հայացքով էր բարևում, կա՛մ ձեռքով: Դա նրա ընդհանուր ոճն է՝ որպես հասարակական-քաղաքական գործիչ: Նույնն էլ մնացած թեկնածուների դեպքում՝ ոչ մի նորություն չկա: Իսկ ինչ վերաբերում է Սերժ Սարգսյանին, ապա նույնիսկ ձեր այդ ասած կիքսերը նրա վարկանիշի վրա կարող են ազդել միայն 0.1-0.2 տոկոսով»:

Լուսանկարը PanARMENIAN Photo-ի