Պոլսո հայոց պատրիարքարանը պատրաստվում է Հայոց ցեղասպանության 100-րդ տարելիցին նվիրված ծիսական արարողություն իրականացրել, որի ժամանակ, սակայն, խուսափելու է կիրառել Հայոց ցեղասպանություն բառը: Նման տեղեկություն է տարածել թուրքական «Հյուրիյեթ» պարբերականի սյունակագիր Օքան Քոնուրալփը:
Ըստ թուրքական աղբյուրի՝ Պատրիարքարանին կից Սուրբ Աստվածածին եկեղեցում ապրիլի 24-ի առավոտյան պատարագ է մատուցվելու, որի ժամանակ հիշելու են «1915 թվականին կյանքից հեռացածներին»: Պատարագը մատուցելու է Պոլսո պատրիարքի ընդհանուր փոխանորդ Արամ արք. Աթեշյանը:
Ըստ նույն աղբյուրի՝ Պոսլո պատրիարքի ընդհանուր փոխանորդը Հայոց ցեղասպանություն արտահայտության փոխարեն կիրառելու է «ընդհանուր ցավ» խոսքը:
Բացի այդ, Թուրքիայի հայկական եկեղեցիները չեն միանալու հայկական և քրիստոնյա մի շարք այլ եկեղեցիներում ապրիլի 23-ին զանգեր հնչեցնելու նախաձեռնությանը։
Հիշեցնենք, որ ապրիլի 23-ին՝ Հայաստանի ժամանակով ժամը 19։15-ին, բոլոր հայկական և քրիստոնյա մի շարք այլ եկեղեցիներում կհնչի զանգերի ղողանջ և գուժկանի 100 հարված, դրանից անմիջապես հետո կհայտարարվի լռության րոպե:
