Թուրքիայի լիբերալ Կանաչներ և ձախ ապագայի կուսակցությունը փետրվարի 13-ին նիստ է հրավիրել Ստամբուլի Գալաթասարայ շրջանի «Ալժիր» ռեստորանում՝ իր համերաշխությունը հայտնելու ադրբեջանցի գրող Աքրամ Այլիսլիին: Այս մասին հայտնում է Hürriyet Daily News-ը:
Այլիսլին հանրության և իշխանությունների կողմից հալածվում է իր վերջին նովելի՝ «Քարե երազների» լույս ընծայումից հետո, որում պատմում է հայ-ադրբեջանական ընկերության մասին:
Հանդիպմանը մասնակցել են բազմաթիվ մտավորականներ, հեղինակներ, պոետներ ու ուսանողներ: Հայ գրող Լևոն Ջավախյանը, որը նույնպես անցել է այդ ճանապարհով, սակայն մետաղադրամի մյուս կողմով, համերաշխության ուղերձ է հղել Այլիսլիին: 2008 թվականին Ջավախյանը հեռացվել է Հայաստանի Գրողների միությունից հայ-ադրբեջանական ընկերության մասին գրելուց հետո:
Թուրքիայում բնակվող ադրբեջանցի մտավորականները մտադիր են այսօր դիմել Մարդու իրավունքների ասոցիացիայի Ստամբուլի գրասենյակ, ինչպես նրա գրողի համար Ադրբեջանի դեսպանատնից պաշտպանություն խնդրել:
Պարբերականը նշում է, որ Ադրբեջանի խորհրդարանը պահանջում է գրողի ԴՆԹ թեստը՝ պարզելու համար, թե իրականում նա հա՞յ է, թե՞ ոչ:
Թուրք ականավոր հրատարակիչ, գրող և մարդու իրավունքի ակտիվիստ Ռաջիփ Զարաքոլուն կոչ է արել միջազգային հանրությանը աջակցել Այլիսլիին: Նա քննադատել Թուրքիայի ձախ խմբերին՝ հայտարարելով, որ իրենք պետք է վերջ տան Ադրբեջանում նման դեպքերին: «Մենք այնքան արևմտամետ ենք դարձել, որ ադրբեջանական խմբերին միայնակ ենք թողել իրենց ճակատագրի հետ: Զորակցություն հայտնելու ժամանակն է»,- ասել է նա:
