Հաջորդ շաբաթ կայանալիք նախագահական ընտրություններում Սերժ Սարգսյանը պատրաստվում է հաղթանակի. մի քանի մրցակիցներ արդեն լքել են ընտրարշավը, որի ընթացքում գրանցվել է թեկնածուներից մեկի նկատմամբ մահափորձ, ևս մեկը հացադուլ է անում: Այս մասին գրում է Bloomberg Businessweek-ը:
59-ամյա Սարգսյանը վայելում է ընտրողների 69 տոկոսի աջակցությունը՝ ի տարբերություն իր հիմնական մրցակից Րաֆֆի Հովհաննիսյանի, որի օգտին, համաձայն հարցումների, պատրաստվում է քվեարկել ընտրողների 11 տոկոսը:
Փետրվարի 9-ին Gallup-ի հրապարակած տվյալներով՝ Պարույր Հայրիկյանը, որի դեմ հունվարի 31-ին մահափորձ էր կատարվել, վայելում է ընտրողների 5 տոկոսի աջակցությունը, իսկ 26-րդ օրը հացադուլի մեջ գտնվող Անդրիաս Ղուկասյանը՝ ընդամենը 1:
Հայաստանը, որի սահմանները հարում են Իրանին, Թուրքիային և Ադրբեջանին, 1991 թվականին Խորհրդային Միությունից անկախանալուց հետո 6-րդ անգամ է նախագահ ընտրում: Պաշտոնավարման առաջին ժամկետում Սերժ Սարգսյանը ձախողեց աղքատության դեմ պայքարը. աղքատ է համարվում երկրի 3 մլն բնակչության 1/3-ը: Աղքատ մարդկանց թիվը 2008 թվականի 23.5 տոկոսից մեծացել է՝ հասնելով 35 տոկոսի:
Համաշխարհային բանկն ու Վերակառուցման ու զարգացման եվրոպական բանկը այս տարի ակնկալում են ՀՆԱ-ի 4-5 տոկոսի աճ, մինչդեռ ՀՀ կառավարության ակնկալիքներն ավելի լավատեսական են՝ 6.2 տոկոս:
Անցած տարի հայկական դրամի փոխարժեքը դոլարի նկատմամբ ընկել է 4.4 տոկոսով:
Նշելով, որ Սարգսյանը մեծացել է Լեռնային Ղարաբաղում, պարբերականն անդրադարձել է մարտիմեկյան դեպքերին, որոնք հաջորդեցին 2008 թվականին Սերժ Սարգսյանի ընտրությանն ու 10 մարդու մահվան պատճառ դարձան:
Տարածաշրջանային հետազոտությունների կենտրոնի տնօրեն Ռիչարդ Կիրակոսյանի խոսքով՝ ընտրությունների մրցակցության պակասը արտացոլում է այսօրվա քաղաքական տխուր իրավիճակը:
Ռիչարդ Կիրակոսյանը անհավանական է համարում 2013-ի հետընտրական հակամարտությունը:
Լուսանկարը PanARMENIAN Photo-ի