Պենտագոնը որոշում է ընդունել արտաշիրիմել, ԴՆԹ-փորձաքննություն կատարել և նույնականացնել Փերլ Հարբորի համար պայքարում զոհված 388 զինվորականների մարմինները: TASS-ի հաղորդմամբ՝ այս մասին ասվում է ԱՄՆ պաշտպանության նախարարության հաղորդագրության մեջ:
«Oklahoma գծանավում ծառայած 388 անհայտ նավաստիների և ծովային հետևակների մնացորդներն այս տարի կարտաշիրիմվեն ԴՆԹ-հետազոտության համար, ինչի միջոցով ծրագրվում է նույնականացնել նրանց»,- նշվում է հաղորդագրության մեջ:
Ռազմական ղեկավարությունն արդեն հաստատել է, որ գծանավի անձնակազմի մեծ մասը կնույնականացվի արտաշիրիմումից հետո: «Զոհվածների մասնիկները կփոխանցվեն Հավայա նահանգի ռազմական լաբորատորիային»,- նշվում է հաղորդագրության մեջ:
ԱՄՆ պաշտպանության նախարարի առաջին տեղակալ Բոբ Ուորքի խոսքով՝ մասունքները «հարազատներին կվերադարձվեն հնարավորինս շուտ»: «Նրանք կհուղարկավորվեն բոլոր զինվորական պատիվներով»,- ասվում է հայտարարության մեջ:
1941թ. ճապոնական ավիացիան հարձակվել է Հավայան կղզում ԱՄՆ «Փերլ Հարբոր» ռազմածովային բազայի վրա՝ 2 ժամում ոչնչացնելով նավատորմի մեծ մասը և 272 ինքնաթիռ: Ամերիկյան կողմից 2.400 մարդ է զոհվել, մոտ 1000 մարդ անհետ կորել է, 1300-ը՝ վնասվածք ստացել: Այդ դեպքն ԱՄՆ-ին հրահրել է ներգրավվել Երկրորդ համաշխարհային պատերազմում և դարձել է Խաղաղ օվկիանոսում պատերազմի սկիզբ:
Ճապոնական ավիացիայի հարձակման ժամանակ Oklahoma-ն դարձել է ականակիրի զանգվածային հարձակումների զոհը: Հարձակման սկզբից մի քանի րոպե հետո Oklahoma-ն կողաշրջվել է: Անձնակազմից մոտ 400 մարդ է զոհվել: Հնարավոր է՝ հենց նրանց մարմինները կնույնականացնեն Պենտագոնի փորձագետները:
