Թուրքիայի նախագահ Ռեջեփ Թայիփ Էրդողանը երեքշաբթի օրը կտրուկ քննադատել է հայերի Ցեղասպանության մասին Հռոմի պապ Ֆրանցիսկոսի արտահայտությունները` դրանք բարբաջանք անվանելով, գրում է RIA Novosti-ն:
«Ամեն անգամ, երբ քաղաքական գործիչները, ինչպես նաև կրոնական գործիչներն իրենց վրա են վերցնում պատմաբանների պարտականություննեը, ապա փաստերի փոխարեն բարբաջանք է ստացվում: Ավելին՝ Անկարան Վատիկանից իր դեսպանին անհապաղ հետ է կանչել խորհրդակցությունների համար»,- հայտարարել է Էրդողանը:
Նա կրկնել է հայկական կողմին ուղղված կոչը երկու երկրների պատմաբանների հանձնաժողով ստեղծելու վերաբերյալ` 1915-ի Ցեղասպանության արխիվային փաստաթղթերն ուսումնասիրելու համար, որոնք Անկարան կբացի հետազոտությունների համար` նմանատիպ քայլի սպասելով նաև պաշտոնական Երևանից:
Հիշեցնենք, որ ապրիլի12-ին Վատիկանի Սուրբ Պետրոս տաճարում Հռոմի պապը սրբազան պատարագ է մատուցել՝ նվիրված Հայոց ցեղասպանության 100-րդ տարելիցին: Իր խոսքում Պապն ասել է, որ «հայերի կոտորածը 20-րդ դարի առաջին Ցեղասպանությունն էր, և չարիքը թաքցնելը կամ ժխտելը հավասարազոր է արյունահոսող վերքն առանց վիրակապի թողնելուն»:
