Թուրքիան Ռուսաստանին հուսալի գործընկեր է համարում ինչպես տարածաշրջանային, այնպես էլ՝ գլոբալ պլանով: RIA Novosti-ի հաղորդմամբ՝ այս մասին Ռուսաստանի Պետդումայի խոսնակ Սերգեյ Նարիշկինի հետ հանդիպման ժամանակ հայտարարել է Թուրքիայի խորհրդարանի նախագահ Ջեմիլ Չիչեքը:
«Այս տարի մենք նշում ենք ինչպես Թուրքիայի Ազգային մեծ ժողովի բացման 95-րդ տարին, այնպես էլ՝ մեր երկրների միջև դիվանագիտական հարաբերությունների հաստատման 95-րդ տարին: Մենք ուրախ ենք նշել, թե որքան ակտիվորեն են զարգանում մեր հարաբերությունները: Դրա հետ կապված՝ մենք Ռուսաստանին տեսնում ենք որպես հուսալի և կարևոր գործընկեր ոչ միայն երկկողմ, այլև տարածաշրջանային և գլոբալ մասշտաբով»,- ասել է Չիչեքը:
Նա նշել է, որ երկու երկրների ղեկավարների միջև հաստատվել են ջերմ, բարեկամական հարաբերություններ, ինչը դրականորեն է ազդում առևտրատնտեսական կապերի վրա:
Իր հերթին, Պետդումայի «Սպրավեդլիվայա Ռոսիա» խմբակցության ղեկավարի առաջին տեղակալ Միխայիլ Եմելյանովն ասել է, որ Ռուսաստանի Պետդումայի խոսնակ Սերգեյ Նարիշկինը թուրք գործընկերոջ հետ հանդիպման ժամանակ հայտարարել է, որ հայ և թուրք ժողովուրդների հարաբերությունների բարելավումը բխում է Ռուսաստանի շահերից:
«Ամենագլխավորը, որ Նարիշկինն ասաց, այն է, որ հայ և թուրք ժողովուրդների հարաբերությունների բարելավումը բխում է Ռուսաստանի Դաշնության շահերից: Մենք հետաքրքրված չենք պատմությունը քաղաքականացնելով»,- ասել է Եմելյանովը:
Նրա խոսքով՝ հանդիպման կողմերը խոսել են այն մասին, թե «ինչպես կարող են հասնել մինչև 100 մլրդ դոլարի ապրանքաշրջանառության նպատակին»:
