Կիպրոսի սուպերմարկետների ցանցերից մեկում ավելի քան 16 տոննա բուրգերներ են ոչնչացրել, վախենալով, որ դրանք կարող են ձիու մսից պատրաստված լինել: Այս մասին, ինչպես փոխանցում է Agence France-Presse-ը, հայտարարել է առողջապահության հանձնաժողովի ներկայացուցիչ Քրիստոս Քրիստուն:
Ինչպես հայտարարել է Քրիստուն, առևտրի ցանցը դեռ հունվարին, երբ համաշխարհային ԶԼՄ-ներում հայտնվեցին մսամթերքում ձիու ԴՆԹ-ի հայտնաբերման մասին հաղորդագրություններ, որոշել էր ոչնչացնել մսամթերքը։ Կիպրոսի իշխանությունները պնդում են, որ կասկածելի մսամթերքը վաճառքում չի հայտնվել:
Վերջին շաբաթներին Եվրոպայի մի շարք խոշոր սուպերմարկետներ վաճառքից հետ են կանչել տավարի մսից պատրաստված մսամթերքը, որոնց մեջ տավարի մսի փոխարեն ձիու միս է հայտնաբերվել: Մասնավորապես, այդպիսի արտադրանք է թողարկել ֆրանսիական Comigel-ը:
Փետրվարի 13-ին հոլանդական ԶԼՄ-ները պարզաբանել են, որ Նիդեռլանդների քաղաքացի Իեն Ֆեյսընն այժմ ղեկավարում է Կիպրոսի Draap Trading ընկերությունը, որի անվանումը հակառակ կարդալիս ձիու միս է նշանակում: Ընկերության ղեկավարը խոստովանել է, որ Ռումինիայի սպանդանոցներից գնել է ձիու միս և վաճառել այն Ֆրանսիայում, սակայն նշել է, որ՝ ոչ տավարի մսի փոխարեն:
ԵՄ-ն գյուղատնտեսության նախարարներն արտահերթ նիստ են անցկացրել, որի արդյունքում կոչ են արել մսի արտադրողներին և վերամշակողներին ավելի պահանջկոտ լինել մսի որակի նկատմամբ: Դրանից բացի, հանդիպման մասնակիցներն առաջարկել են մսամթերքի զանգվածային ստուգումներ անցկացնել:
