ՀՀ կառավարությունն այսօր նիստում որոշել է Երևանի ավագանու հերթական ընտրությունը նշանակել 2013 թ. մայիսի 5-ին։
Կառավարությունը սահմանել է, որ ՀՀ կենտրոնական ընտրական հանձնաժողովը ՀՀ 2013 թ. պետբյուջեով նախատեսված 65.5 մլն դրամ նախահաշվային արժեքով ծառայությունը ձեռք է բերում բանակցային ընթացակարգով` առանց գնումների հայտարարությունը նախապես հրապարակելու։ Խոսքը վերաբերում է տեղամասային ընտրական հանձնաժողովների անդամների անհատական կնիքների, դրոշմակնիքների պատրաստմանը, ընտրական անհրաժեշտ փաստաթղթերի, քվեաթերթիկների տպագրությանը, դրոշմակնքման հատուկ թանաքանյութի ներկրմանը։ Որոշման ընդունումը թելադրված է այն հանգամանքով, որ նշված աշխատանքն իրականացնելու համար օրենսդրությամբ սահմանված են խիստ որոշակի ժամկետներ։
Գործադիրը հաստատեց ՀՀ մարդու իրավունքների պաշտպանի աշխատակազմի 2012-2013 թթ. ընտրությունների ընթացքում ՄԻՊ գրասենյակի կարողության զարգացման ծրագրի արտաբյուջետային հաշվի միջոցների 2013 թ. նախահաշիվը։
Նիստի ավարտին վարչապետ Տիգրան Սարգսյանը հիշեցրել է, որ ՀՀ օրենսդրության համաձայն առաջիկա երկուշաբթին` փետրվարի 18-ը, ՀՀ նախագահի ընտրության օրը, հայտարարվել է ոչ աշխատանքային օր։
