«Թրանսփարենսի Ինթերնեյշնլ հակակոռուպցիոն կենտրոն» ՀԿ-ն Բաց հասարակության հիմնադրամներ-Հայաստանի աջակցությամբ իրականացրել է 2012թ. հանրապետության նախագահի ընտրությունների ընտրական թվերի էլեկտրոնային մոնիտորինգ: Մոնիտորինգի առաջին փուլում վեր է հանվել ՀՀ մարզերի և Երևան քաղաքի մշտական բնակչության (համաձայն 2011թ. մարդահամարի) և 2013թ. հունվարի 9-ից ՀՀ ոստիկանության կայքում տեղադրված ընտրողների թիվը՝ ըստ մարզերի և Երևան քաղաքի ընտրողների:
Ընտրողների թիվը ներկայացված է ըստ նրանց տարիքի, հասցեների՝ հաշվառված, ոչ ստանդարտ կամ առանց հասցեների: Ներկայացված է նաև այն ընտրողների թիվը, որոնց ծննդյան օրն ու ամսաթիվը նշված չեն, ինչպես նաև նրանց, որոնց տվյալները տարբեր տեղամասերում ամբողջովին համընկնում են:
Համաձայն 2001 և 2011 թվականների մարդահամարների տվյալների՝ ՀՀ մշտական բնակչությունը նվազել է 194.157 մարդով: Միևնույն ժամանակ, համեմատելով 2003 և 2013 թվականների ընտրողների թվերը, պարզվում է, որ ընտրողների թիվն աճել է 202.346-ով: Ընտրացուցակներում առկա է 73.087 ընտրող, որոնք ծնվել են մինչև 1932 թ. հունվարի 1-ը, և 5613 ընտրող՝ ծնված 1995թ. հունվարի 1-ից հետո:
Ընտրացուցակներում առկա է 10.773 հասցե, որոնցում հաշվառված է 10 և ավելի ընտրող, 49.843 ընտրողների մոտ բացակայում են ծննդյան օրվա և ամսվա տվյալները:
Մոնիտորինգի արդյունքում պարզվել է նաև, որ Հայաստանի Հանրապետությունում կա 196 ընտրող, որոնց տարիքը 100-ն անց է: Հանրապետության 17 հասցեներում կա 100-ից ավելի գրանցված մարդ, 112 զույգ ունեն բացարձակ նույն տվյալները՝ անուն-ազգանուն-հայրանունը, և նույնիսկ ծննդյան ամսաթիվն և օրն են կրկնվում: Սակայն ինչպես լրագրողների հետ զրույցում տեղեկացրեց «Թրանսփարենսի ինթերնեյշնլ» ՀԿ-ի ղեկավար Վարուժան Հոկտանյանը, իրեն ոստիկանությունից ասել են, որ դա պարզապես համընկնում է:
Վարուժան Հոկտանյանը անդրադարձավ նաև ընտրակեղծիքներին՝ ասելով, որ իր համար ամենաանընդունելին վարչական ռեսուրսի կիրառումն է:
«Հայաստանում տարածված է անընդունելի մի երևույթ՝ վերադասն իր աշխատակցին ստիպում է քվեարկել այս կամ այն թեկնածուի օգտին. սա ամենաահավոր ընտրակեղծիքն է: Գործարանում կամ աշխատավայրում ցուցակագրում են, անձնագրի տվյալներ հավաքում և այլն: Արդեն մի քանի նման դեպքի մասին լսել եմ: Ինչ վերաբերում է մի հասցեում 100-ից ավելի գրանցում ունեցող մարդկանց, ապա մեզ հաջողվեց այցելել նրանցից միայն մեկը, և պարզվեց, որ 49-50 սեփական տուն պարզապես նույն հասցեն ունեն: Ցավոք, մենք այդքան հնարավորություն չունեինք ստուգելու մնացածը»,- ասաց նա:
Վ. Հոկտանյանը վստահված անձանց և դիտորդներին հորդորում է, հաշվի առնելով վերը նշվածը, քվեարկության օրը ընտրատեղամասերում լինել ծայրաստիճան ուշադիր:
