«Առաջին լրատվական»-ի զրուցակիցն է ազատամարտիկ, Ապարանի ջոկատի հրամանատար Ռազմիկ Պետրոսյանը:
-Պարոն Պետրոսյան, Ազատամարտիկների դաշինքը հայտարարություն տարածեց, որտեղ կոչ է անում ազատ արձակել Ժիրայր Սեֆիլյանին ու նրա ընկերներին։ Ձեր կարծիքով, ինչո՞ւ իշխանությունները նման կոշտ քայլի գնացին, նաև ինչպե՞ս եք վերաբերվում «100-ամյակն առանց ռեժիմի» շարժման գործունեությանը։
-Ես միշտ ասել եմ, որ ամեն ինչ իր ժամանակին է պետք, որ ապրիլի 24-ին ընդառաջ ներքաղաքական խնդիրներ վեր հանելն անթույլատրելի է, բայց այնպես, ինչպես վարվեցին «100-ամյակն առանց ռեժիմի» նախաձեռնության անդամների հետ, անթույլատրելի է: Ամեն դեպքում, իշխանության պատճառաբանությունները, թե անհրաժեշտություն կար տղերքին մեկուսացնելու, ձերբակալելու, ազատազրկելու, այնքան էլ հիմնավոր չէ: Ես այս մոտեցումները դատապարտել եմ, և դատապարտում եմ, մանավանդ, որ գործը ազատամարտիկի հետ է կապված։ Ինձ համար դա անընդունելի է, քանի որ բոլորս էլ գիտենք` ազատարմատիկները երբեք այնպիսի քայլ չեն անի, որը կվնասի Հայաստանի Հանրապետությանը: Այնպես չէ, որ ազատամարտիկները ձգտում են իշխանության, իհարկե ոչ: Ունեն խնդիր երկրի վիճակը լավացնելու: Նրանք իհարկե չէին տանի երկիրը ապակայունացման, անվտանգության հետ կապված խնդիր չէր առաջանա, լարված վիճակ չէր լինի, դրա համար որևէ վտանգ չկար, և մեր հայտարարությունը իշխանություններին հենց դրա մասին էր:
-Բայց չեք մասնակցում նրանց ակցիաներին, որտեղ պահանջում են անհապաղ ազատ արձակել ձերբակալվածներին:
-Մենք միանշանակ գիտենք, որ այստեղ իշխանությունները քաղաքական կամք պետք է դրսևորեն: Նրանք այն մարդիկ չէին, որ կարող էին վտանգ ներկայացնել մեր երկրին: Հետագա քայլերն իշխանությունները պետք է անեն: Եվ դրանից հետևություն կլինի: Իրավական առումով նրանք այսօր ոչ մի հիմնավորում չեն ներկայացրել, որ մենք համոզվեինք, որ այլ ճանապարհ չկար, քան տղաների ձերբակալությունը, որ պարտադիր մեր երկրի և մեր հյուրերի անվտանգությունը վտանգված էր: Նրանք քաղբանտարկյալներ են, պայքարի արդյունքում են հայտնվել անազատության մեջ և այսօր, երբ մենք աշխարհին ներկայանում ենք 100-րդ տարելիցին այս վիճակով, սա խոսում է այն մասին, որ երկրի վիճակը տագնապալից է:
-Իրական վտա՞նգ զգաց իշխանությունը 100-ամյակն առանց ռեժիմի գործողություններում, դրա՞ համար դիմեց այսպիսի քայլերի:
–Եթե հիմա իրենք ուզում են այնպես անել, որ ընդդիմադիր որևէ մեկին չհանդիպեն, ապա ստիպված կլինեն բնակչության 90 տոկոսին աքսորել, որովհետև 90 տոկոսն այսօր ընդդիմադիր է։ Այսօր ուրիշ խնդիր է դրված, պետք է նրանք մեր պետության, մեր երկրի, մեր վաղվա օրվան ուղղված կառավարման մեխանիզմը փոխեն, ոչ թե այս կամ այն խմբին ձերբակալեն, ահաբեկեն, քաղաքական ուժերի ղեկավարներին վախեցնեն, հարկային տեռոր անեն, դատական գործընթացներ սկսեն և այլն։ Ճիշտ հակառակը, պետք է այդ ամենը մի կողմ դնեն ու մտածեն, թե ինչպես կարելի է երկիրն այս վիճակից դուրս բերել։ Հիմա մենք բոլորս նույն նավի վրա ենք։ Մենք այսօր խոսում ենք ցեղասպանության մասին, բայց այսօր ցեղասպանում ենք մեր ազգին, որտեղ արտագաղթն ահագնացող տեմպերի է հասել։ Լավ, աշխարհին ի՞նչ ենք ուզում ցույց տալ, որ օսմանցի թուրքից ավելի լա՞վն ենք, մինչդեռ այսօրվա իշխանությունը մեզ հետ նույն կերպ է վարվում։ Եթե այսօր մարդիկ ահազանգում են խնդիրների մասին, ոչ թե պետք է նրանց ազատազրկել, այլ վերանայել սեփական վարքը։ Այնպես որ, հորդորում եմ իշխանություններին ազատ արձակել ձերբակալված տղաներին։ Իսկ տղաներին ու ոչ միայն նրանց, կասեմ, որ այսօր ներքաղաքական խնդիրների ժամանակը չէ, պետք է մեր բոլորի ջանքերը համատեղենք՝ աշխարհին ներկայացնելու Հայ դատի խնդիրը։
Այն, որ ժամ առաջ մեր երկրին իշխանափոխություն է պետք, դրանում կասկած չկա, դա, իմ համոզմամբ, միակ ձևն է երկիրն այս վիճակից հանելու համար, բայց ապրիլի 24-ի նախաշեմին ներքաղաքական խնդիրներ բարձրացնելուն կողմ չենք։ Ես վստահ եմ, որ տղաներն արդեն փոխել էին իրենց դիրքորոշումը և ապրիլի 24-ից հետ էին պայքարի դուրս գալու, որի մասին արդեն հայտարարել էին։ Այնպես որ, դրսի հյուրերի անվտանգության պատրվակով նրանց ձերբակալելն անհիմն էր։ Ինձ համար իշխանությունների ներկայացրած այդ փաստարկները հիմնավոր չեն ու չհամոզեցին։
