ԱՄՆ նախագահ Բարաք Օբաման դատապարտել է հոգեթերապևտներին, որ հանձն են առնում փոխել միասեռականներին, բիսեքսուալներին կամ դեռահաս տրանսգենդերներին՝ դարձնելով հետերոսեքսուալ: Այս մասին հայտնում է BBC-ի ռուսական ծառայությունը:
ԱՄՆ նախագահի հայտարարությունը պատասխան էր Սպիտակ տան կայքում զետեղված միջնորդագրին, որը պահանջում էր արգելել այսպես կոչված «ռեպարատիվ թերապիան»:
3 ամսում դիմումը ստորագրել էր ավելի քան 120 հազար մարդ:
Միջնորագրի համար առիթ էր դարձել 17-ամյա տրանսգենդեր աղջկա՝ Լիլի Օլկորնի ինքնասպանությունը անցած տարվա դեկտեմբերին:
Նամակում, որը հրապարակվել էր Tumblr ցանցում, Օլկորնը գրել էր, որ չի կարող այլևս ապրել այն գիտակցումով, որ իր քրիստոնյա ծնողները հրաժարվում են իրեն որպես կին ընդունել:
«Ես խաղաղություն կգտնեմ միայն մի դեպքում, եթե գա օր, երբ տրանսգենդերների հետ կդադարեն վարվել այնպես, ինչպես ինձ հետ էին վարվում: Իմ մահը պետք է ինչ-որ իմաստ ունենա: Փոխեք հասարակությունը, խնդրում եմ»,- գրել էր աղջիկը:
Ռեպարատիվ թերապիան ներառում է թերապևտիկ զրույցներ ու աղոթքներ: Դրան կողմնակից են սոցիալ-պահպանողական խմբերն ու կրոնական բժիշկները, որոնք կարծում են, որ այդ մեթոդն օգնում է քրիստոնյաներին հաղթահարել իր սեռի ներկայացուցիչների նկատմամբ ձգողականությունը:
ԼԳԲՏ ակտիվիստներն ու պրոֆեսիոնալ հոգեթերապևտներն ասում են, որ այդ պրակտիկան միայն մեծացնում է դեպրեսիայի ռիսկը և հիվանդների ինքնասպանությունների դեպքերի քանակը:
