«Առաջին լրատվական»-ի զրուցակիցն է ՀՀԿ պատգամավոր Սուքիաս Ավետիսյանը:
– Պարոն Ավետիսյան, իշխանություններն Աբովյանի նախկին քաղաքապետ Կարապետ Գուլոյանին նշանակեցին Կոտայքի մարզպետ, որպեսզի այդպիսով քաղաքականությունից հեռանալու համար փոխհատուցե՞ն Գագիկ Ծառուկյանին:
– Ես այդպես չեմ կարծում: Քանի որ նախկին մարզպետին տեղափոխեցին այլ աշխատանքի, հարմար են գտել, որ նրան նշանակեն: Կարծում եմ` ճիշտ է, որ այն մարզերում, որտեղ կան խոշոր քաղաքներ, և դրանց քաղաքապետերը լավ են աշխատել, չէր խանգարի, որ նրանք հետագայում իրենց փորձեն մարզպետի պաշտոնում:
– Այսինքն` այդ նշանակումն անցավ Մելիք-Ադամյան փողոցով:
– Ընդհանրապես, ամեն ինչ անցնում է Մելիք-Ադամյան փողոցով:
– Այսուհետ «Բարգավաճ Հայաստան» կուսակցությունը նույնպե՞ս պետք է անցնի Մելիք-Ադամյան փողոցով:
– Դա ԲՀԿ-ից հարցրեք:
– Գյումրիի քաղաքապետ Սամվել Բալասանյանը դուրս եկավ ԲՀԿ-ից: Ձեզ համար ավելի հարմար է աշխատել նրա՝ որպես ԲՀԿ անդամի՞, թե՞ որպես անկուսակցական քաղաքապետի հետ:
– Ինձ համար երբևիցե խնդիր չի եղել, և քաղաքական ուղղվածությունն ինձ համար երբևիցե դժվարություն չի ստեղծել, երբ քաղաքի և ազգաբնակչության հարցերը լուծել եմ քաղաքապետարանի ու անձնամբ քաղաքապետի հետ:
– Ս. Բալասանյանը շարունակո՞ւմ է մնալ ՀՀԿ-ի թեկնածուն կամ քաղաքապետը, ինչպես ընտրություններից առաջ Սերժ Սարգսյանն էր հայտարարում:
– Սերժ Սարգսյանը հայտարարել է, որ Ս. Բալասանյանը բոլորի կողմից ընդունված թեկնածու է: Նա առաջադրվել ու ընտրվել է, այսօր ինքը մնում է ընտրված քաղաքապետ՝ ընդունված բոլոր քաղաքական ուժերի կողմից: ՀՀԿ-ն էլ է աջակցել նրան ընտրությունների ժամանակ:
– Նաև դուրս եկավ ԲՀԿ-ից, քանի որ ՀՀԿ-ի՞ թեկնածուն էր:
– Եթե ՀՀԿ-ն ընտրությունների ժամանակ նրան աջակցել է, ուրեմն նաև ՀՀԿ-ն իր լուման է ունեցել նրա ընտրության հարցում:
– Պարոն Ավետիսյան, Գյումրիում դանակահարություններ, կրակոցներ, սպանություններ շատ են տեղի ունենում: Ինչո՞ւ Գյումրին իրենից չի թոթափում քրեական քաղաք լինելու համբավը:
– Նախ մենք պետք է ավելի շատ փորձենք վերլուծել հետերկրաշարժյան Գյումրին: Ցավոք սրտի, մենք պետք է ասենք, որ գյումրեցին դրա լուծը դեռ չի թոթափել: Տարբեր ուսումնասիրություններ ցույց են տալիս, որ որտեղ կա սոցիալական մեծ լարվածություն, այդտեղ նմանատիպ դեպքերն ու պատահարները շատ են լինում: Ես դա առաջին հերթին համարում եմ սոցիալական լարվածության արդյունք, և ցավում եմ, որ Գյումրին պարբերաբար հայտնվում է նման կարգավիճակում:
– Այդ խմբերն ինչո՞ւ էին փորձում խոչընդոտել Հիմնադիր խորհրդարանի հանրահավաքը:
– ՀԽ-ի գործունեությունը խոչընդոտել-չխոչընդոտելու մասին խոսք լինել չի կարող: Եթե նրանք ընդամենը 30-40 հոգով միտինգ են անում, ես դա չեմ համարում լուրջ քաղաքական իրադարձություն, որ դրան խոչընդոտեին:
– Այդ դեպքում, արդեն երկրորդ անգամ ինչո՞ւ են խոչընդոտում նրանց հավաքները:
– Իսկ ո՞վ է ասել, որ ժողովուրդն իրավունք չունի խոչընդոտելու հակահայկական դրսևորումը:
– Ինչո՞վ է հակահայկական դրսևորում:
– Որովհետև, եթե ՀԽ-ն իր առջև խնդիր է դնում խանգարել ապրիլի 24-ի միջոցառումների շարքը, ապա դա ժողովրդին դուր չի գալիս, և ես դա համարում եմ հակահայկական:
– Ժիրայր Սեֆիլյանը հայտարարել է, որ ապրիլի 24-ից են սկսելու իշխանափոխության գործողությունները:
– Ընդհակառակը` նա կոչ է անում, որ ապրիլի 24-ին մենք իշխանափոխություն ենք անելու: Իսկ ես դա համարում եմ իրոք հակահայկական, և դա ժողովրդին դուրս չի գալիս:
– Եթե հակահայկական է, ապա ո՞ր պետությանն է դա ձեռնտու:
– Իմ կարծիքով` կան նման պետություններ և նման կառույցներ, որոնց դա ձեռնտու է:
– Փաստորեն, Գյումրիում չի կարելի որևէ ակցիա անել, որովհետև այդ քաղաքի քրեական հեղինակությունները կփորձեն խոչընդոտել դրանց:
– Գյումրիում կարելի է անել շատ ակցիաներ: Գյումրիում շատ լավ ակցիաներ են լինում: Բայց գյումրեցին թույլ չի տալիս նաև, որ հակահայկական դրսևորումներ լինեն:
– Ձեզ բավարարո՞ւմ է Ավետիսյանների սպանության հետ կապված քննությունը: Այն՝ որ Վալերի Պերմյակովը պետք է դատվի Ռուսաստանի օրենքներով:
– Ես ի սկզբանե ասել եմ, որ Պերմյակովը միանշանակ դատվելու է Հայաստանում, և կապ չունի, թե որ օրենքով: Չորս քրեական գործ հարուցվել է ռուսական կողմից: Դատվելու է ՀՀ-ում, բայց դեռ պարզ չէ, թե դա ռուսական 102-րդ ռազմաբազայի՞ տարածքում կլինի, թե՞ տարածքից դուրս: Եվ երկու կողմերն էլ համակարծիք են, որ դատը պետք է լինի հնարավորինս հրապարակային:
– Բայց եթե վերահսկողությունն իրականացնելու է ռուսական կողմը, ի՞նչ նշանակություն կունենա, թե դատը որ տարածքում է լինելու:
– Բայց ինձ համար էլ նշանակություն չունի, թե ով է իրականացնում վերահսկողությունը: Ինձ համար կարևոր է, որ նախաքննության վերջում և դատավարության ընթացքում, ի վերջո, լույս սփռվի մարդկանց մոտ առկա բոլոր հարցադրումների վրա: Առավել ևս՝ Ավետիսյանների ընտանիքի հարազատների մոտ: Եվ այդ ստորը ստանա ամենաբարձր պատիժը, որը նախատեսվում է մեր կամ Ռուսաստանի օրենքներով: Ընդ որում` ռուսական քրեական դատավարական օրենսգրքում այդ պատիժն ավելի խիստ է, քանի որ մենք մահապատիժ չունենք, նրանք ունեն: Թեև դրա նկատմամբ 1996թ. մորատորիում է հայտարարված:
