Ստեղծարար տեխնոլոգիաների «Թումո» կենտրոնը հաղորդագրություն է տարածել, որում նշվում է, որ կենտրոնի հիմնադիր Սեմ Սիմոնյանի հրավերով ապրիլի 2-ին «Թումո» է այցելել երկրորդ նախագահ Ռոբերտ Քոչարյանը:
«Թումո» կենտրոնը, որն իր տեսակի մեջ եզակի է Հայաստանում, ստեղծվել է հենց նրա նախագահության տարիներին: Կենտրոնը հիանալի հնարավորություն է Հայաստանում այն երեխաների և պատանիների համար, որոնք հետաքրքրված են տեղեկատվական տեխնոլոգիաներով և կարող են զուգորդել իրենց ստեղծագործական կարողությունները այդ տեխնոլոգիաների հետ աշխատանքով՝ դառնալով մրցունակ մասնագետներ ժամանակակից աշխարհում:
Թե ինչու են «Թումո»-ում որոշել հյուրընկալել Ռոբերտ Քոչարյանին՝ դժվար է ասել: Միգուցե այս ընթացքում նա մշտապես ինչ-որ կապ պահպանել է կենտրոնի հետ, և այցելությունը դրվագներից մեկն է:
Քոչարյանի այցելությունն ուշագրավ է ներհայաստանյան վերջին քաղաքական զարգացումների ֆոնին: Խնդիրն այն է, որ այդ զարգացումները՝ այսպես, թե այնպես, առնչվում էին նաև Ռոբերտ Քոչարյանին, նրա հնարավոր քաղաքական ծրագրերին, հավակնություններին, նրա վերադարձի հեռանկարներին:
Այս ամենին զուգահեռ՝ մինչև հայտնի իրադարձությունները հարցազրույցների և հայտարարությունների միջոցով հրապարակում մնացող և ոչ իշխանական դաշտի պրոցեսները նրբորեն կառավարող Ռոբերտ Քոչարյանը հայտնի իրադարձություններից հետո, ըստ էության, լուռ է և որևէ կերպ չի արձագանքել վերջին զարգացումներին: Եվ այս առումով բաց է մնացել նաև նրա քաղաքական պլանների հարցը, որն ընդհանրապես այդպես էլ ոչ մի անգամ հստակ պատասխան չստացավ Ռոբերտ Քոչարյանի շուրթերից՝ վերջապես նա մտադրություն ունի՞ վերադառնալու Հայաստանում քաղաքական ակտիվ կյանք, թե՞ չունի նման մտադրություն: Քոչարյանը մինչև վերջին պահը ոչ «այո» ասաց և ոչ էլ ասաց՝ «ոչ»:
Միաժամանակ, այն, ինչ տեղի ունեցավ փետրվարին ԲՀԿ-ի հետ, ըստ էության նաև Ռոբերտ Քոչարյանի քաղաքական պարտությունն էր, քանի որ նա, իհարկե, ոչ ուղղակիորեն, սակայն բավական ակնառու տարբեր միջոցներով ցույց էր տվել հասարակությանը, որ ԲՀԿ-ն է հանդիսանալու այն հիմնական խողովակը, կամ, այսպես ասած, այն հանգամանքների դասավորությունը, որը պայմանավորելու էր նրա հնարավոր վերադարձը:
Ահա այս ֆոնին, նրա լռության ֆոնին «Թումո» կատարած այցը, հրավերն ու նաև այդ այցելության մասին հաղորդագրության ու լուսանկարների հրապարակումը իսկապես բավական ուշագրավ են: Մինչ այս Ռոբերտ Քոչարյանից փաստորեն հրապարակվում էին միայն մոսկովյան հյուրանոցի ֆիթնես-սրահում նրա վարժանքների տեսագրություններ՝ երևի ցույց տալու համար, որ Քոչարյանն ակտիվ մարզումների, մարզավիճակի մեջ է և պատրաստվում է վերադառնալ: Իսկ հիմա փաստորեն ցուցադրում են, թե ինչպես է նա այցելել մանկապատանեկան կենտրոն և հետևել, թե ինչպես են երեխաները իրացնում իրենց կարողությունները, ինչին փոքր-ինչ «այլաբանորեն» մոտենալու դեպքում կարող ենք ասել, որ քաղաքական թոշակառուին առավել հարիր իրավիճակ է, և միգուցե Քոչարյանն ակնարկում է, որ քաղաքականությունն այլևս դադարում է լինել նրա հետաքրքրությունների առաջին սանդղակում:
Այնուամենայնիվ, փետրվարյան իրադարձություններից հետո առկա հարցը շարունակում է մնալ օրակարգային, քանի դեռ Ռոբերտ Քոչարյանն ինքը առանց «այլաբանությունների» չի արտահայտվել թե տեղի ունեցած զարգացումների, թե ընդհանրապես՝ քաղաքականության հանդեպ իր հետագա դիրքավորման մասին, որն էլ միգուցե կօգնի որոշակի հստակություն մտցնել նաև նրա քաղաքական թիմի անդամներ համարվող տարբեր գործիչների հետփետրվարյան տարաբնույթ գործողություններում:
