Երկրորդ համաշխարհային պատերազմի տարիներին Շվեյցարիայի իշխանությունները 3000 հրեա փախստականներին թույլ չեն տվել հատել սահմանը: Այս թիվը 8 անգամ փոքր է, քան նախկինում կարծում էին: Նման եզրակացության է եկել ֆրանսիացի պատմաբան Սերժ Կլարսֆելդը՝ հաղորդում է The Local-ը:
Գիտնականը հերքել է պատմաբան Ժակ Բերժիեի հանձնաժողովի 1999թ. եզրակացությունները, համաձայն որոնց՝ շվեյցարացի սահմանապահները մահվան են մատնել 25.3 հազար մարդու: Կլարսֆելդի խոսքով՝ Ժնևի գործընկերների հետ խորհրդակցությունների արդյունքում, ինչպես նաև տարբեր փաստաթղթերի ուսումնասիրությունից հետո այդ թվերը հերքվել են:
Պատմաբանը ասել է, որ հրեաների մեծ մասը փորձել է Շվեյցարիա մտնել Ֆրանսիայից:
Կլարսֆելդի խոսքով՝ հավանաբար նախկին թվում ներառված են եղել նաև ոչ հրեական ազգությամբ մարդիկ:
Նա նշել է, որ իր բացահայտումը չափազանց կարևոր է Շվեյցարիայի համար, որը հաճախ է ստիպված լինում արդարանալ հրեաների հանդեպ այդ տարիներին դրսևորած ոչ բարյացակամ վերաբերմունքի համար: