«Առաջին լրատվական»-ի զրուցակիցն է Քաղաքացիական շտաբի մամուլի խոսնակ Վարդան Քոչարյանը:
–ԲՀԿ-ից դուրս գալուց հետո Տիգրան Ուրիխանյանը հայտարարեց, որ կձևավորի նոր կուսակցություն: Քաղաքացիական շտաբն արդեն համալրվում է մարդկանցով: Ի՞նչ փուլում է գտնվում, և ի՞նչ ակնկալիքներ կան:
–Քաղաքացիական շտաբը նախաձեռնվել է որպես կազմակերպություն` հազարավոր քաղաքացիների կողմից: Այս պահին ընթանում են նախապատրաստական աշխատանքներ մեր՝ մայիսի 2-ին կայանալիք համագումարի անցկացման ուղղությամբ: Այս պահին փորձում ենք ձևավորել նաև տարածքային կառույցներ, քանի որ կուսակցություն հիմնելու համար օրենքի պահանջն է, որ առնվազն 4 մարզում պետք է ունենալ ներկայացուցչություն: Այս պահին մենք ակտիվ գործողություններ ենք իրականացնում:
–Ո՞ր մարզերում:
–Օրենքի պահանջն է` գոնե 4 մարզում: Այս պահին մենք տարբեր մարզերում ձևավորում ենք տարածքային կառույցներ, նաև ակտիվ նախապատրաստական աշխատանքներ են տարվում մեր առաջիկա համագումարի համար, որը տեղի է ունենալու և հռչակելու «Քաղաքացիական շտաբ» նախաձեռնությունը որպես կուսակցություն:
–Կուսակցությունը կղեկավարի Տիգրան Ուրիխանյանը: Քանի՞ անդամ ունեք այս պահին` այս կարճ ժամանակահատվածում: Դուք նշեցիք` հազարավոր մարդիկ, բայց ինչպե՞ս եք կարողանում մարդկանց տեղ հասցնել:
–Ես կցանկանայի, որպեսզի մեր գործողությունների մասին ինֆորմացիան, այդ թվում` նաև լրատվամիջոցներին, տրամադրվեին գործողությունների տեղի ունենալուն պես: Ականատես կլինեք նաև մեր համագումարին, թե քանի անդամ կա կուսակցությունում:
–Երիտասարդնե՞ր են հիմնականում:
–Տարբեր ոլորտի, տարբեր տարիքային խմբերի ներկայացուցիչներ: Մեկ բան կարող եմ ասել, որ կուսակցությունում լինելու են ազնիվ, ակտիվ և պարկեշտ մարդիկ: Մնացած գործողություններին և ինֆորմացիային ականատես կլինեք արդեն գործողությունների տեղի ունենալուն պես: Ավելացնեմ միայն, որ մենք ապրիլից սկսում ենք բաց քննարկումներ սահմանադրական հայեցակարգի բարեփոխումների շուրջ, որտեղ մենք ու բոլոր նրանք, ովքեր կցանկանան մասնակցել քննարկումներին, կարտահայտեն իրենց դիրքորոշումը սահմանադրական փոփոխությունների հայեցակարգի վերաբերյալ:
-Ո՞վ է ֆինանսավորելու կուսակցությունը, հնարավո՞ր է Գագիկ Ծառուկյանը ֆինանսավորի:
-Մեկընդմիշտ այդ թեման փակելու համար հերքում եմ դա, իհարկե, նման բան չկա, և այդ հարցը հոգնեցուցիչ է դարձել բոլորիս համար:
Ավելին՝ տեսանյութում:
