Չորեքշաբթի ֆրանսիացի հետաքննիչները երկրի նախկին նախագահ Նիկոլյա Սարկոզիին կհարցաքննեն 2012 թ. նրա նախընտրական արշավի ֆինանսավորման համար հաշվարկների գործով: Agence France-Presse-ի հաղորդմամբ՝ Սարկոզին ժամանել է Փարիզի բարձրագույն ատյանի դատարանի ֆինանսական հարցերով հետաքննիչ խմբի շենք:
Երկրի նախագահի ընտրություններում նախընտրական արշավի անցկացման համար ֆինանսական ծախսերը սովորաբար փոխահտուցում է ֆրանսիական պետությունը՝ պայմանով, որ դրանք չեն գերազանցում որոշակի սահմանը: Հետաքննությունը ցույց է տվել, որ Նիկոլյա Սարկոզին 2012 թ. զգալիորեն գերազանցել է այդ սահմանագիծը: Այդ պատճառով նա ոչ միայն փոխհատուցում չի ստացել, այլև նրա նկատմամբ տուգանք է սահմանվել, որը, սակայն, նրա փոխարեն վճարել է «Միություն հանուն ժողովրդական շարժման» կուսակցությունը: Ֆրանսիայի արդարադատութունը դա դիտարկում է որպես կանոնների լուրջ խախտում:
Ինչպես հայտնի դարձավ՝ չորեքշաբթի առավոտյան բերման են ենթարկվել Սարկոզիի 3 օգնականները՝ նրա 2012 նախընտրական արշավի տնօրենը, գանձապահը և փաստաբաններից մեկը: Նրանք մեղադրվում են այդ նախընտրական արշավի ֆինանսվորմանը վերաբերող կեղծ ֆինանսական փաստաթղթեր ստեղծելու համար: Նրանց հարցաքննում են Ֆրանսիայի իրավական ոստիկանությանը կից կոռուպցիայի դեմ պայքարի վարչության հետաքննիչները:
