Ցուցարարները Եգիպտոսի մայրաքաղաքի մետրոյի կենտրոնական կայարաններից մեկում երթևեկությունը խաթարել են, ինչպես նաև քաղաքի կենտրոնական կամրջի վրա փակել են ավտոմեքենաների ճանապարհը: Ինչպես հայտնել է MENA տեղեկատվական գործակալությունը, ցուցարարները կանգնել են ռելսերի վրա և ձեռնամարտի բռնվել ուղևորների հետ:
Միևնույն ժամանակ, ցուցարարների մեկ այլ խումբ էլ Կահիրեի կենտրոնական կամրջի վրա` նախագահական նստավայրի մոտ, խափանել է երթևեկությունը:
Ցուցարարները պահանջում են երկրի նախագահ Մուհամմեդ Մուրսիի հրաժարականը` նրան մեղադրելով 2011 թ. հեղափոխության գաղափարներին դավաճանելու մեջ։
Այսօր՝ ավելի վաղ Եգիպտոսի «Մուսուլման եղբայրներ» իշխող կուսակցությունը մերժել է ընդդիմության` «հավասարակշռված կառավարություն» ստեղծելու առաջարկը` ընդդիմադիրներին մեղադրելով ոչ ժողովրդավարական լինելու և Մուրսիին, որպես օրինական ընտրված նախագահ, չընդունելու մեջ։
«Մուսուլման եղբայրներ» կուսակցության փոխնախագահ Էսամ Էրնանը հայտարարել է, որ երկրի ղեկավարը մտադիր չէ թողնել պաշտոնը մինչև պաշտոնավարման ժամկետի լրանալը:
Կառավարության դեմ հանդես է գալիս հասարակության աշխարհիկ զանգվածը: Խորհրդարանական վերջին ընտրությունների արդյունքների համաձայն, որոնք այնուհետև չեղյալ համարվեցին, ոչ իսլամական կուսակցությունները վայելում են երկրի բնակչության փոքրամասնության լիակատար աջակցությունը:
Արդեն երկու շաբաթ է՝ Եգիպտոսում անկարգությունները չեն դադարում: Կահիրեում նախագահի նստավայրի մոտ ոստիկանությունն արցունքաբեր գազ է կիրառել, իսկ ցուցարարները քարեր են նետել: Եգիպտոսի ազգային փրկության ճակատը պահանջել է դատավարություն սկսել երկրի նախագահի դեմ, ով, ըստ նրանց, մեղավոր է երկրում շարունակվող արյունահեղությունների համար, որոնց զոհ է գնացել ավելի քան 60 մարդ:
