«Իրազեկ և պաշտպանված սպառող» ՀԿ-ն դիմում է ներկայացնելու ՀՀ էկոնոմիկայի նախարարության շուկայի վերահսկողության պետական տեսչությանը, որպեսզի ընթացք տրվի մարտի 6-ին Իրինա Ալեգրովայի չկայացած համերգի տոմսերի վերադարձման գործընթացին: «Առաջին լրատվական»-ի հետ զրույցում այս մասին ասաց ՀԿ նախագահ Բաբկեն Պիպոյանը՝ հավելելով, որ իրենք դիմել են տոմսերը վաճառող «Ֆորպոստարտ» ընկերությանը, բայց մինչև հիմա տեղաշարժ չկա. «Ոչ մի փոփոխություն, սա ուղղակի սպառողի իրավունքների ոտնահարում է. սպառողը իրավունք ունի իր ցանկությամբ ապրանքը փոխանակել կամ վերադարձնել»:
Բաբկեն Պիպոյանը շեշտեց, որ սպառողները դիմել են ոչ միայն ՀԿ, այլև տոմսարկղեր, «Ֆորպոստարտ», բայց կրկին ոչ մի արդյունք, հակառակը՝ վերադարձման հետ կապված ներկայացումներ են բեմադրվում։ «Սկզբում ասում էին, որ փորձում են վերադարձնել այն տոմսերը, որոնք նվեր են եղել, հետո ասացին՝ թող տոմսերը ուղարկեն, տեսնենք՝ եթե հրավեր չէ, կքննարկենք»,- մանրամասնեց Բաբկեն Պիպոյանը:
Նա տեղեկացրեց, որ ի վերջո ընկերությունը ասել է՝ տոմսերը ետ կընդունեն և կվճարեն, երբ որ կկարողանան: Ետ չվերցնելու համար բերվում են ամենատարբեր պատճառաբանություններ: Ընկերությունը նաև առաջարկել էր տոմսերը չվերադարձնել և սպասել համերգի կայացմանը ապրիլի 6-ին, սակայն համերգի կայացման օրը կրկին հետաձգվեց միչև մայիսի 23։ «Շատ սպառողների համար համերգի այդ օրը հարմար չէ, ի վերջո՝ փոխհատուցում ստանալը իրենց իրավունքն է»,- նշեց Բաբկեն Պիպոյանը:
Նա նաև տեղեկացրեց, որ սպառողների մեծ մասը չի կարողանում ընկերության հետ կապ հաստատել. նշում են, որ տոմսերի վերադարձման հարցերով պետք է գրեն իրենց էլեկտրոնային հասցեին, այնուհետև պատասխանում են ռուսերեն՝ առանց մտածելու, որ հայ սպառողի հետ գործ ունեն։
«Մեզ հաջողվել էր հեռախոսահամար գտնել, որը հիմա անհասանելի է, և բազմաթիվ հարցեր մնում են օդում կախված»,-մանրամասնեց Պիպոյանը՝ հավելելով, որ Forpostart Prodaction-ի հիմնադիր և պրոդյուսեր Զառա Մխեյանի հետ կարողացել են կապ հաստատել «Ֆեյսբուք» սոցիալական ցանցի միջոցով, բայց կրկին սպառիչ պատասխաններ չկան։
