ԱՄՆ Դելավեր նահանգի Ուիլմինգթոն քաղաքի դատարաններից մեկում հրաձգության հետևանքով մի քանի մարդ վիրավորվել է:
Վիրավորների թվի և նրանց ստացած վերքերի ծանրության աստիճանի մասին դեռևս տեղեկատվություն չկա:
Դատարանի շենքից մարդիկ տարհանվել են: Ներկայումս այնտեղ աշխատում են տեղի իրավապահ մարմինների ներկայացուցիչները: Այդ մասին տեղեկացնում են էլեկտրոնային լրատվամիջոցները` հղում կատարելով ABC հեռուստաալիքին:
Նախօրեին Լավջոյ քաղաքում (Ջորջիա նահանգ) երեք մարդ լուրջ տուժել էին կրակոցներից, որոնք տեղի էին ունեցել սրճարաններից մեկում հաճախորդների միջև ծագած վեճի հետևանքով:
Ոստիկանության ներկայացուցիչները հայտնել են, որ տեղի ժամանակով ժամը 12:30-ի սահմաններում մի խումբ երիտասարդներ մտել են սրճարան և «ինչ-որ բան չեն կիսել» սրճարանում գտնվող մեկ այլ խմբի երիտասարդների հետ: Հարցերի պարզաբանման համար նրանք դուրս են եկել սրճարանից և գնացել ավտոկայանատեղի, որտեղ էլ տղաներից մեկը կրակ է բացել, ինչի արդյունքում 3 հոգի լուրջ վիրավորվել են: Նրանց տեղափոխել են հիվանդանոց:
Կասկածյալը դեպքի վայրից ավտոմեքենայով փախուստի է դիմել, սակայն ոստիկանության կողմից կարճ ժամանակահատվածում հայտնաբերվել է: Նա 21-ամյա Դյունտ Ջոնսն է եղել:
