Սուդանի հնագիտական պեղումների Սեդենգա վայրում հայտնաբերվել են 35 փոքր բուրգեր, որոնք խիտ կերպով տեղավորված են սահմանափակ տարածքում: Բուրգերը 2000 տարվա վաղեմություն ունեն: Այս մասին հայտնում է Press TV-ն և նշում, որ դրանք պատկանում են Կուշ թագավորության ժամանակաշրջանին:
Կուշը, ունենալով ընդհանուր սահման Եգիպտոսի և Հռոմեական կայսրության հետ, իր մշակույթում ներառել է դամբարանների կառուցման եգիպտական ճարտարապետության և ավանդույթների տարրեր:
2009-2012թթ. հայտնաբերված բուրգերը տարբեր չափերի են: Ամենամեծ բուրգերի լայնությունը հասնում է 22 ոտնաչափի, իսկ ամենափոքրերը նախատեսված են երեխաների հուղարկավորության համար:
Բուրգերի տանիքները տարիների ընթացքում վնասել են ուղտերի քարավանները: Հայտնաբերված բուրգերը ևս մեկ անգամ վկայում են Սուդանի կրոնական և մշակութային բազմազանության մասին:
