ՀՀ ԱԺ նախագահ Հովիկ Աբրահամյանը 2 տարի առաջ տվել է լավ ընտրությունների բանաձևը: Ըստ այդմ՝ դրանք այն ընտրություններն են, որոնք ստացել են միջազգային կառույցների դրական գնահատականը: Այսօր լրագրողների հետ հանդիպման ժամանակ այս մասին ասաց ՀՀ նախագահի թեկնածու Անդրիաս Ղուկասյանը՝ անդրադառնալով ԵԱՀԿ/ԺՀՄԻԳ դեսպանի խոսքին, թե իրենք տրիբունալ կառույց չեն:
Ըստ նրա՝ իհարկե, առաքելությունը տրիբունալ չէ, բայց այն սերտիֆիկատ տվող ատյան է և ռեժիմներին տալիս է վավերացում:
«2008թ. նման սերտիֆիկատ տրվեց Ռոբերտ Քոչարյանի գլխավորած կառավարությանը, և այդ կառավարությունն ուժ գործադրեց ընտրություններում ընտրակեղծիքների դեմ ընդվզող քաղաքացիների նկատմամբ, որի հետևանքով 10 մարդ զոհվեց: Առ այսօր պարզ չէ, թե ով է եղել մեղավոր, և պետության ներկայացուցիչներից ոչ ոք այս գործողության պատասխանատվությունն իր վրա չվերցրեց:
Ուստի միջազգային դիտորդական առաքելությունն, իհարկե, տրիբունալ չէ, բայց այն պատասխանատվություն է կրում մեր հանրության առջև այն մոլորության համար, որն առաջանում է հանրության մոտ, երբ իր աչքի առաջ ծավալվում են ընտրախախտումներով ընտրություններ, զանգվածաբար բաժանվում է ընտրակաշառք, կամ քվեարկում են հարկադրաբար: Նման ընտրությունները ստանում են գնահատական, թե դրանք անցել են ստանդարտներին համապատասխան: Դա նշանակում է, որ Եվրոպայում է՞լ են ընտրակաշառք բաժանում, դա նշանակում է, որ Եվրոպայում է՞լ են քաղաքական գործիչները դուրս գալիս ու հրապարակավ ասում, որ ինչքան կուզենան՝ կխփեն: Դե, թող գնահատական տան»,- մեկնաբանեց Անդրիաս Ղուկասյանը:
Նրա կարծիքով՝ այսօր արդեն առաքելությունը կարող է հավաքել իր ունեցվածքն ու Հայաստանից հեռանալ, որովհետև ինչպես և թեկնածուները պետք է լրջորեն ընդունեն Սերժ Սարգսյանի ասածը, այնպես էլ դիտորդները նույն լրջությամբ պետք է վերաբերվեն այդ քաղաքական գործչի խոսքերին:
Հիշեցնենք, որ «Ազատություն» ռադիոկայանի հետ զրույցում Եվրոպայի անվտանգության և համագործակցության կազմակերպության Ժողովրդավարական հաստատությունների և մարդու իրավունքների գրասենյակի Ընտրությունների դիտորդական առաքելության ղեկավար, դեսպան Հայդի Թալիավինին նշել էր, որ իրենք տրիբունալ չեն։ Ըստ նրա՝ իրենք չափազանց տեխնիկական կազմակերպություն են։
«Գոյություն ունեն, այսպես կոչված, կոպենհագենյան պարտավորություններ և միջազգային չափանիշներ, յուրաքանչյուր երկիր ունի իր օրենսդրությունը, և միակ չափորոշիչը, որը տեխնիկական է, այն է, որ մենք գնահատում ենք տվյալ ընտրությունների անցկացման համապատասխանությունը պարտավորություններին։ Այսպիսով, մենք իրապես հանդես չենք գալիս ընտրությունների լեգիտիմությունը որոշող քաղաքական հայտարարությամբ։ Յուրաքանչյուր երկիր ինքը պետք է որոշի իր ընտրությունների լեգիտիմությունը։ Մենք ուղղակի վերլուծում ենք և գնահատում այն, ինչ տեղի է ունենում ընտրությունների ժամանակ։ Այնպես որ՝ պետք չէ ԺՀՄԻԳ-ից ընտրությունների վերաբերյալ դատավճիռ ակնկալել, և դա մեր գործը շատ ավելի կբարդացներ, քանի որ երկրները երկար կմտածեին՝ մյուս անգամ մեզ հրավիրե՞լ, թե՞ ոչ։ Մենք ուղղակի տեխնիկական աշխատանք ենք կատարում»։
Լուսանկարը՝ PanARMENIAN Photo-ի
