Հարավաֆրիկյան Հանրապետության նախագահ Ջեքոբ Զուման, որը կիրակի օրը ժամանել էր Տրիպոլի` Քադաֆիի հետ բանակցություններ վարելու, հայտարարել է, որ Լիբիայի ղեկավարությունը հաստատել է «ճանապարհային քարտեզը», որը ներկայացվել էր Աֆրիկյան միության կողմից, և նպատակ ունի առաջարկելու ներքաղաքական համակամարտության կարգավորման տարբերակներ: Այս մասին հաղորդում է Reuters գործակալությունը: Բացի Զումայից, Տրիպոլի են ժամանել նաև Կոնգոյի, Մալիի, Ուգանդայի և Մավրիտանիայի ղեկավարները:
«Մենք համաձայնության ենք եկել մեր եղբոր հետ (Քադաֆիի հետ)»,- ասել է Ջեքոբ Զուման` հավելելով, որ դա ենթադրում է կրակի դադարեցման ռեժիմի ապահովում: Նա նաև ավելացրել է, որ իրենց պատվիրակությունը նպատակ ունի անհապաղ Բենղազի պատվիրակություն ողարկել, որպեսզի նմանատիպ բանակցություններ վարեն նաև ապստամբների ղեկավարության հետ:
Ինչպես հայտարարել է Աֆրիկյան միության խաղաղության և անվտանգության հարցերով հանձնակատար Ռամթանե Լամամրան, «ճանապարհային քարտեզով» նախատեսվում է նաև Մուամար Քադաֆիի հրաժարականը: «Դրա մասին էլ է խոսք եղել, սակայն մանրամասները ես չեմ կարող բացահայտել: Այս տեղեկությունը պետք է մնա գաղտնի, իսկ Լիբիայի առաջնորդին պետք է ընտրի Լիբիայի ժողովուրդը»,- ասել է Լամամրան:
Նա հավելել է, որ «ճանապարհային քարտեզով» նախատեսվում է կրակի անհապաղ դադարեցում, բանակցություններ իշխանությունների և ընդդիմության միջև, օտարերկրյա քաղաքացիների անվտանգության ապահովում և հումանիտար օգնության ցուցաբերում:
