Իրանի նախագահն ու խորհրդարանի խոսնակը կրկին հրապարակայնորեն առճակատում են ունեցել: Սկզբում նրանք խորհրդարանում վիրավորանքներ են փոխանակել, այնուհետև ձերբակալվել է նախագահի մոտ զինակիցներից մեկը: Իրանական էլիտայում բացահայտ առճակատմանն անդրադարձել է Kommersant-ը:
Աշխարհում չի գտնվի որևէ թերթ կամ հեռուստաալիք, որն անդրադարձ արած չլինի անցած շաբաթ Իրանի նախագահ Մահմուդ Ահմադինեժադի մոտ զինակիցներից մեկի՝ Թեհրանի նախկին դատախազ Սայիդ Մորթազավիի ձերբակալությանն ու ազատարձակմանը: Փորձագետները նրան անվանում են առանցքային գործիչ, որն օգնել է Ահմադինեժադին պահպանել պաշտոնը 2009-ի ընտրություններից հետո, որոնք չէին ճանաչվել ընդդիմության կողմից և Թեհրանում բազմահազարանոց ցույցերի պատճառ էին դարձել:
Մորթազավին դաժանորեն ճնշել է Ահմադինեժադի հաղթանակին չհամաձայնողների ելույթները: 2010 թվականին նա ստիպված է եղել լքել դատախազի պաշտոնը: Դատական իշխանությունները նրան մասսակից են ճանաչել առնվազն 3 ընդդիմադիրների կտտանքների ենթարկելու և մահվան մեջ: Մորտազավիին հաջողվել է խուսափել բանտարկությունից: Նախագահը արագ խորհրդականի տեղ է գտել նրա համար նախարարություններից մեկում և, դատելով ամեն ինչից, առավելագույնս ջանքեր գործադրել, որպեսզի նա մնա ազատության մեջ:
Անցած շաբաթ Մորթազավին, առանց որևէ բացատրության, ձերբակալվել էր և 36 ժամ բանտում անցկացնելուց հետո ազատ արձակվել՝ կրկին առանց բացատրության: Դեպքը տեղի է ունեցել այն ժամանակ, երբ նախագահը պատմական այցով Եգիպտոսում էր՝ առաջին անգամ 1979-ի իսլամական հեղափոխությունից հետո:
Դժվար չէ ենթադրել, որ Թեհրանի նախկին դատախազի ձերբակալության իրական պատճառը դատական համակարգի ուժի ցուցադրումն է, որը ամբողջովին խորհրդարանի խոսնակ Ալի Լարիջանիի կողմից է: Ավելին, Իրանի դատական համակարգը ղեկավարում է նրա եղբայրը՝ Սադեկ Լարիջանին:
Ուժի ցուցադրումը տեղի է ունեցել մի քանի օր անց այն բանից, երբ խորհրդարանում Ահմադինեժադը Լարիջանի եղբյարների դեմ կոռուպցիոն բնույթի մեղադրանքներ է հնչեցրել: Նիստը նվիրված էր Իրանի աշխատանքի նախարարի պաշտոնից հեռացնելուն: Վերջինս նախագահի հանձնառությամբ Մորթազավիին նշանակել էր իր խորհրդական:
Ահմադինեժադին և Լարիջանին հրապարակային հակասություններ են ունեցել նաև 2011 թվականին, երբ Ահմադինեժադը հեռացրել էր իրանական հատուկ ծառայությունների ղեկավարին, իսկ խորհրդարանականները, համարելով դա հարձակում գերագույն առաջնորդ Ալի Խամենեի դեմ, վերականգնել էին նրա պաշտոնը:
