ՀՀ նախագահի թեկնածուներ Հրանտ Բագրատյանի, Րաֆֆի Հովհաննիսյանի և Պարույր Հայրիկյանի համախմբումը մեկ թեկնածուի շուրջ նախագահական ընտրությունների արդյունքը չի փոխի, բայց ընտրությունները կդառնան ավելի հետաքրքիր: «Առաջին լրատվական»-ի հետ զրույցում ասաց Հայաստանի սոցիոլոգիական ասոցիացիայի նախագահ, սոցիոլոգ Գևորգ Պողոսյանը՝ անդրադառնալով ՀՀ նախագահի թեկնածու Պարույր Հայրիկյանի կոչին ուղղված Հրանտ Բագրատյանին և Րաֆֆի Հովհաննիսյանին՝ միավորվել մեկ թեկնածուի շուրջ:
Նա նշեց, որ հարցը կայանում է նրանում, թե արդյո՞ք Րաֆֆի Հովհաննիսյանն ու Հրանտ Բագրատյանը կարձագանքեն Պարույր Հայրիկյանի այդ կոչին, որովհետև, ինչքան մեզ հայտնի է, դեռ իրենք չեն կողմնորոշվել: Սակայն, սոցիոլոգի համոզմամբ, բոլոր դեպքերում Րաֆֆի Հովհաննիսյանի համար, որը կարծես թե ՀՀ նախագահիթեկնածուների շարքում իր վարկանիշով երկրորդն է, այնքան էլ ձեռնտու չէ ինչ-որ մեկի հետ միավորվել, որովհետև, ըստ երևույթին, ինքը համարում է, որ իր վիճակն այս քաղաքական պայքարում լավ է: Նա նկատեց նաև, որ հարցական է՝ Բագրատյանը կմիանա՞ Պարույր Հայրիկյանի կոչին, թե՞ ոչ:
«Եթե երեքով միանան, դա, իհարկե, կարող է շատ բան փոխել, բայց կրկին հարց է ծագում, թե իրենք ի՞նչ ֆորմատով, ի՞նչ ձևաչափով են միանալու: Եթե սա լիներ ՀՀ ԱԺ ընտրություններ, երկու-երեք կուսակցություն միավորվում են և ինչ-որ ալյանս են կազմում, դա ընկալվումէ նորմալ, հասկացվում է, որպես կուսակցությունների միավորված մոտեցում՝ կոալիցիա, բայց երբ խոսքը առաջին և միակ տեղի համար է, այնքան էլ պարզ չէ, թե ինչ ձևաչափով կարող են երեք հոգի միանալ և պայքարել մեկ տեղի համար: Բոլոր դեպքերում հարցականներն ավելի շատ են, քան պատասխանները:Ես կարծում եմ՝ դա չի ստացվի պարզապես»,- իր տեսակետը հայտնեց Գևորգ Պողոսյանը:
Վերջինս պարզաբանեց, որ սոցիոլոգիական հաշվումների տեսանկյունից, եթե մարդիկ իրենց վարկանիշներով միանում են, չի նշանակում, որ պարզապես թվաբանական գումարում է տեղի ունենում: Ըստ նրա՝ եթե այդ միացումը լինի, որը հետաքրքիր փորձ կլինի քաղաքական դաշտում, բոլոր դեպքերում ձայների աճ տեղի կունենա, և սա կլինի միացյալ ընդդիմության, կոալիցիոն ընդդիմության քայլը, որը կարող է ընտրողներին մոբիլիզացնել:
«Սակայն, ենթադրաբար ենք ասում, 5 տոկոս Պարույր Հայրիկյանի վարկանիշն է, 5՝Հրանտ Բագրատյանինը և 15-20%՝ Րաֆֆի Հովհաննիսյանինը, եթե նույնիսկ գումարենք 30 տոկոսը չի գերազանցում:Այսինքն, որ ասենք, թե մեծ բարդություն կամ վտանգ է այս միացումը ներկայացնելու առաջատար թեկնածուի համար, բոլոր դեպքերում երկրորդ փուլի վտանգ չի առաջանում: Արդյունքի տեսանկյունից փոփոխություն չի լինի, բայց ընտրությունները կդառնան ավելի հետաքրքիր»,- ասաց Գևորգ Պողոսյանը:
Հիշեցնենք, որ երեկ ՀՀ նախագահի թեկնածու, ԱԻՄ առաջնորդ, վերջերս մահափորձի ենթարկված Պարույր Հայրիկյանը Facebook-ի իր էջում բաց նամակով դիմել էր ընդդիմադիր դաշտի թեկնածուներին՝հորդորելով միավորվելմեկ թեկնածուի շուրջ: