Վրաստանի նախագահ Միխեիլ Սաակաշվիլին ափսոսանք է հայտնել ուրբաթ երեկոյան Թբիլիսիի Ազգային գրադարանի դիմաց նախկին քաղբանտարկյալների և նրանց կողմնակիցների՝ ընդդիմության ներկայացուցիչների հետ բախման առիթով: «Ես պատրաստ էի կտրուկ քննադատության, բայց խորհրդարանի մեծամասնությունը հրաժարվեց լսել իմ ելույթը»,- ասել է Սաակաշվիլին։ Այս մասին հայտնում է Trend.az-ը:
Նա նշել է, որ լավ է հասկանում քաղաքական շարժն ու նախագահության ընթացքում «մտադիր չէր կառավարությունն ու խորհրդարանը ցրել, քանի որ դա կոչնչացնի առաջին հերթին նրան, ով այդպիսի որոշում կընդունի»:
Նա ուշադրություն է հրավիրել ներկայիս կառավարության և խորհրդարանական մեծամասնության էական հակասությունների վրա:
«Նրանք ուզում են խորհրդարանը Քութայիսից տեղափոխել Թբիլիսի, ես դրան համաձայն չեմ. դա մեր առաջին գլխավոր հակասությունն է: Նրանք ուզում են խորհրդարանը Թբիլիսի տեղափոխել, որպեսզի կառավարությունն ավելի լավ կառավարի այն, իսկ մենք կողմնակից ենք իշխանության ճյուղերի բաժանմանը և, որպես խորհրդարանական հենք, Արևմտյան Վրաստանի ամրապնդմանը»,- նշել է նա:
Երկրորդ տարբերությունը նախագահն անվանել է այն, որ մեծամասնությունն ուզում է չեղյալ համարել ուղղակի նախագահական ընտրություններն ու նախագահին խորհրդարանում նշանակել:
Սաակաշվիլին՝ որպես պետության ղեկավար, ներողություն է խնդրել այսօր տեղի ունեցած դեպքի համար: «Սա մեր պատասխանատվությունն է, մեր բոլորի»,- ասել է նա:
«Մենք լավ հիշում ենք, թե ինչպես Վրաստանի առաջին նախագահին քշեցին նախ՝ նրա նստավայր, հետո՝ բունկեր, և այդ պատմությունը մինչ օրս չի ավարտվել, բայց ինձ բունկեր չեն ուղարկի, առավել ևս, որ այդ պալատն ապակե է, թափանցիկ, ինչը հենց իմ կյանքի սկզբունքն է»,- նշել է Սաակաշվիին:
