BAFTA-ի կողմից մրցանակակիրների հայտարարման և ոսկե դիմակների հանձնման հանդիսավոր արարողությունը տեղի կունենա կիրակի օրը Լոնդոնում:
Արարողությունը տեղի կունենա Թագավորական օպերայի և բալետի թատրոնում, կմասնակցեն բազմաթիվ համաշխարհային աստղեր: Երեկոն կվարի հանրահայտ գրող և դերասան Սթիվեն Ֆրայը:
Այս տարի ոսկե դիմակների գլխավոր հավակնորդը «Լինքոլնն» է: Ֆիլմը պատմում է ամերիկացի նախագահ Աբրահամ Լինքոլնի կյանքի և գործունեության մասին: Այն հավակնում է 24 մրցանակներից 10-ին:
Ինը մրցանակների հավակնորդներ են «Պիի կյանքը» 3D դրաման և «Մերժվածները» երաժշտական ֆիլմը: Բոնդի մասին նոր «Սքայֆոլ» ֆիլմը հավակնում է ութ մրցանակների, Իրանում ամերիկացի պատանդների մասին «Արգո գործողությունը»՝ յոթ, «Աննա Կարենինա»-ի նոր էկրանավորումը՝ վեց մրցանակների:
«Լավագույն ֆիլմի» համար պայքարում են «Արգո գործողությունը», «Մերժվածները», «Պիի կյանքը», «Լինքոլնը» և «Թիվ մեկ նշանակետը»:
Լավագույն ռեժիսորի տիտղոսի համար պայքարում են Միխայիլ Հենկեն, Բեն Աֆլեկը, Քվենտին Տարանտինոն, Էնգ Լին և Քեթրին Բիգելոուն:
Լավագույն դերասանուհու տիտղոսի համար պայքարում են Էմանուել Ռիվան, Հելեն Միրենը, Ջենիֆեր Լոուրենսը, Ջեսիկա Չեսթեյնը և Մարիոն Քոթիյարը:
Լավագույն դերասանի տիտղոսի համար առաջադրված են Բեն Աֆլեկը, Բրեդլի Կուպերը, Դենիել Դեյ-Լյուիսը, Հյու Ջեքմանը և Հոակին Ֆենիքսը:
Հաղթողին Բրիտանական ակադեմիայի 6 հազար անդամները կընտրեն քվեարկության արդյունքում: Իսկ «Տարվա հայտնությունը» կընտրվի հանդիսատեսի կողմից SMS-հաղորդագրությունների և ինտերնետ-հարցման արդյունքում:
