Հյուսիսային Կորեայի կողմից հերթական միջուկային փորձարկման դեպքում ԱՄՆ-ը այդ հանրապետությունը կվերադարձնի ահաբեկչությանը հովանավորող երկրների ցանկ,- ըստ ITAR-TASS-ի՝ հաղորդել է ԱՄՆ պետդեպի պաշտոնական ներկայացուցիչ Վիկտորյա Նուլանդը:
Նրա խոսքով՝ «միջուկային տեխնոլոգիաների հետ կապված գործունեությունը պետք է կարգավորվի վեցակողմ բանակցությունների ընթացքում»:
Հիշեցնենք, որ հունվարի 22-ին ՄԱԿ-ի ԱԽ-ն միաձայն ընդունել է նոր բանաձև, որը ընդլայնում է Հյուսիսային Կորեայի նկատմամբ պատժամիջոցները: Դա պատասխան էր Փխենյանի կողմից անցած տարվա դեկտեմբերի 12-ին արհեստական արբանյակով հրթիռի գործարկման:
Իր հերթին, Հյուսիսային Կորեան հայտարարել է «ռազմական հզորությունը մեծացնելու» և միջուկային նոր փորձարկումներ անցկացնելու մասին:
ԱՄՆ-ը Հյուսիսային Կորեային ներառել էր նման երկրների ցանկում 1987 թ., այն բանից հետո, երբ ոչնչացվել էր հարավկորեական ինքնաթիռներից մեկը. Փխենյանը հերքում էր իր մասնակցությունը ինքնաթիռի պայթյունին՝ պնդելով, որ դեպքի հեղինակները հարավկորեական հատուկ ծառայություններն են։ Սակայն 2008 թ. ԱՄՆ-ը հայտարարեց հանրապետությունը սև ցուցակից հանելու մասին: