«Տարիքի պատճառով չմասնակցել կարևորագույն քաղաքական իրադարձությանը՝ քո պիկի շրջանում, հետո ասել՝ այս-այս պատճառներով գալիս եմ, չեմ կարծում, որ հանրության կողմից դա կընկալվի»,- «Առավոտի» հետ զրույցում անդրադառնալով ՀԱԿ առաջնորդի՝ երեկ «գաղտնազերծած» այն տեսակետին, որ ՀԱԿ-ը պետք է կուսակցության վերակազմակերպվի, ասաց ՀՀԿ խմբակցության քարտուղար Հովհաննես Սահակյանը:
Նկատի ունենալով 2007-ից մեկնարկած և 2012-ի խորհրդարանական ընտրություններով արդեն անփառունակ վախճան գրանցած քաղաքական զարգացումները՝ իշխանության ներկայացուցչին թերթը խնդրեց տեսակետ հայտնել, թե իր կարծիքով՝ ո՞րն էր առաջին նախագահի առաքելությունը՝ տասը տարվա լռությունից հետո: «Տեր-Պետրոսյանը հանրության հիշողություններում այդքան էլ լավ կերպար չէր մնացել: Թեպետ իմ ցանկությունն է, որ առաջին նախագահը մնար պատմության և հանրության հիշողություններում որպես սիմվոլ, մենք ձեռք ենք բերել անկախություն, ԼՂՀ գործընթաց է եղել, հակամարտություն և այլն: Ցավոք, մինչև 2008-ի «վերակենդանացումը» Տեր-Պետրոսյանին նաև ցրտի ու մթի պիտակներ էին կպցնում: Կարծում եմ՝ նաև կենսագրությունը մաքրելու խնդիրն էր դրված իր առջև: Նա ցանկացավ մնալ հաղթանակած առաջնորդի կերպարով»: Թե որքանո՞վ դա հաջողվեց առաջին նախագահին՝ ՀՀԿ-ական պատգամավորն ասում է. «Այո, միգուցե չգար, գուցե առավել հաղթանակած և առաջնորդի կերպարով մնար: Իսկ եթե եկավ, պետք է մինչև վերջ գնար: Տարիքը պատճառաբանելով՝ չառաջադրվել, հետո ասել, թե ՀԱԿ-ը վերակազմակերպվի, ես ղեկավարեմ… քաղաքականության մեջ կաս՝ ուրեմն կաս, չկաս՝ ուրեմն չկաս»:
