Հայտնի թուրք սյունակագիր Օրհան Քեմալ Ջենգիզը «Բուգյուն» պարբերականում լույս տեսած իր հոդվածում անդրադարձել է Ցեղասպանության կազմակերպիչներից Ջեմալ փաշայի թռանը` Հասան Ջեմալին շնորհված հեղինակավոր մրցանակին` շնորհավորելով վերջինիս և նրա հասցեին դրական խոսքեր շռայլելով:
Օրերս Հասան Ջեմալը, ով Հայոց ցեղասպանության փաստն ընդունող փոքրաթիվ թուրք մտավորականներից է, Հարվարդի համալսարանի Նիմանի հիմնադրամի Խղճի և ճշմարտության լրագրողական մրցանակի է արժանացել:
Այս փաստն էլ արձանագրել է Ջենգիզը` առիթն օգտագործելով իր գործընկերոջ վերաբերյալ դրական արտահայտվելու համար: Իր հոդվածում Ջենգիզն արձանագրել է նաև Հասան Ջեմալի` Հայոց ցեղասպանության վերաբերյալ բարձրաձայնելու քայլերը:
«Ամենաուժեղ քամիները միշտ նրա ուղղությամբ են փչել, երբ նա դեմ է հանդես եկել զինվորական կառավարությանը, պատմել է Հայոց ցեղասպանության մասին, խոսել քրդական հարցից…»,- իր՝ «Թուրքիայի ճիչը. Հասան Ջեմալ» հոդվածում գրում է Ջենգիզը:
Նշենք, որ Հասան Ջեմալը ճանաչում է Հայոց ցեղասպանությունը, որն իրականացվել է իր պապի անմիջական միջամտությամբ: Ցեղասպանություն ճանաչելու վերաբերյալ իր անցած ուղու մասին Ջեմալը գրել է «1915. Հայոց ցեղասպանությունը» գիրքը: Թեև Ջեմալը բարձրաձայնում է Ցեղասպանության մասին, կոչ անում ճանաչել այն, սակայն հաճախ խուսափում է խոսել տարածքային վերադարձի և նյութական փոխհատուցման մասին, ինչն էլ որոշակի քննադատություն է առաջ բերում հայ հասարակության շրջանում:
