Ըստ The Wall Street Journal-ի՝ Հայաստանը ծրագրում է ԱՄՆ-ում և Լոնդոնում հանդիպել ներդրողների հետ՝ թողարկելու դոլարային պարտատոմսերի երկրորդ խմբաքանակը։
Նոր պարտատոմսերի թողարկումից Հայաստանը 7-10 տարում 500 մլն դոլար կստանա։ Ըստ պարբերականի՝ դրանք կարող են թողարկվել հաջորդ հինգշաբթիից ոչ ուշ։
Նշենք, որ Հայաստանը վերջին անգամ դոլարային պարտատոմսեր է թողարկել 2013 թվականի սեպտեմբերին՝ 7 տարով և 6.25 տոկոս եկամտաբերությամբ՝ փոխառնելով 700 մլն դոլար։
Տնտեսագետ Վիլեն Խաչատրյանի կարծիքով՝ դոլարային պարտատոմսերի թողարկումը որոշ առումով նպաստավոր է, քանի որ դոլարի կուրսը ներկայումս որոշակի աճի միտում ունի, սակայն մյուս կողմից վտանգավոր է, քանի որ ավելացնում է մեր արտաքին պարտքը: «Ամերիկյան տնտեսությունը զարգանում է, և դաշնային պահուստային համակարգը որոշել է անցում կատարել ավելի կոշտ դրամավարկային քաղաքականության, որը որոշակի առումով ձեռնտու է,- «Առաջին լրատվական»-ի հետ զրույցում ասաց տնտեսագետը՝ հավելելով,- բնականաբար, հիմա ձեռք է տալիս դոլար վերցնել, որովհետև, կոպիտ ասած, հիմա էժանով վերցնում են, տոկոսները կլինեն ավելի ցածր, ու ընթացքում դոլարն ավելի կբարձրանա և որոշակի օգուտներ կմնան»:
Խաչատրյանի կարծիքով՝ սա արվում է նրա համար, որպեսզի կենտրոնական բանկի պահուստները համալրվեն: Նպատակը դա է:
Այնուամենայնիվ, տնտեսագետի խոսքով, սա ունի նաև իր բացասական կողմը, քանի որ դրանով ավելանում է արտաքին պարտքը, որի սահմաններն արդեն անցնում են թույլատրելիի սահմանները: «Ես ամեն տեսակի պարտքի ավելացմանը դեմ եմ: Պարտք վերցնելը վտանգավոր է, բայց այս պահին սա լուծում է: Եվ հուսով եմ, որ այն կուղղվի միայն Կենտրոնական բանկի պահուստների ավելացմանը»,- եզրափակեց տնտեսագետը:
