Օքլենդի նավահանգիստը չի թարմացնի վեցանիշ լոբբիստական պայմանագիրը Հայոց ցեղասպանությունը մերժող ամերիկացի նախկին օրենսդիր Դիք Ջեֆարդի հետ։ Այս մասին հայտնում է Asbarez-ը՝ հղում անելով Ամերիկայի Հայ դատի հանձնախմբի արևմտյան տարածաշրջանի ներկայացուցիչներին։
Ներկայացուցիչների պալատի դեմոկրատական մեծամասնության նախկին առաջնորդը ծառայում է որպես Թուրքիայի օտարերկրացի գործակալ՝ ԱՄՆ կողմից Հայոց ցեղասպանության դատապարտմանն ու ոգեկոչմանը խոչընդոտելու գործում։ Անցած ամիս Հայ դատի հանձնախմբի արևմտյան տարածաշրջանի գրասենյակը գովաբանեց Լոս Անջելեսի քաղաքային իշխանություններին նրա հետ ունեցած 850 հազար դոլար արժեքով պայմանագիրն ավարտին հասցնելու համար։ Նա քարոզչական գործունեություն էր ծավալում Los Angeles World Airports-ի անունից։
Փետրվարի 24-ին հայկական կողմը նամակ էր գրել Օքլենդի նորընտիր քաղաքապետ Լիբի Շաֆին՝ անհանգստություն հայտնելով Ջեֆարդի հետ Օքլենդի նավահանգստի հարաբերությունների առնչությամբ։ Նշվում է, որ նա նավահանգստին տարեկան վճարել է 160 հազար դոլար։ Նամակը քաղաքապետին է ուղարկվել, քանի որ նա պատասխանատու է նավահանգիստների հարցերով զբաղվող հանձնակատարների խորհրդի անդամների բոլոր 7 թեկնածուների առաջադրման համար։
Այս ամիս ավելի վաղ հայտնի էր դարձել, որ լոբբիստի ընկերությունը նոր գործարք է կնքել Թուրքիայի հետ։ Թուրքիան պարտավորվել է 1.7 մլն դոլար վճարել 2015-ի մարտից դեկտեմբեր, ի թիվս գործունեության այլ տեսակների, Հայոց ցեղասպանության ակտիվ ժխտման համար։
