Եգիպտոսի ոստիկանությունը ձերբակալել է չորս մարդու, որոնք կասկածվում են Կահիրեում Իրանի նախագահ Մահմուդ Ահմադինեժադի դեմ հարձակում իրականացնելու մեջ: Այս մասին հաղորդում է RIA Novosti-ն՝ վկայակոչելով Եգիպտոսի անվտանգության ուժերի ներկայացուցչին:
Նրա խոսքերով՝ պարզվել է այն տղամարդու ինքնությունը, որը փորձել է կոշիկ շպրտել Իրանի նախագահի վրա: Նա հայտնի փաստաբան է, որը սովորաբար պաշտպանում է իսլամական կազմակերպությունների շահերը: Սակայն նա դեռևս ձերբակալված չէ:
Եգիպտոսի ոստիկանության կողմից ձերբակալված տղամարդկանցից մեկը «Ալ-Ջիհադ» իսլամիստական խմբավորման անդամ է, եգիպտական բանակի նախկին սպա: Ձերբակալվածներից մեկն էլ Սիրիայի քաղաքացի է, իսկ մյուս երկուսի ինքնությունը պարզվում է: Չի հստակեցվում, թե ձերբակալվածներն ինչում են մեղադրվում:
Մահմուդ Ահմադինեժադը Կահիրե է ժամանել Իսլամական համագործակցության կազմակերպության չորեքշաբթի կայանալիք գագաթնաժողովին մասնակցելու համար: Վերջին 30 տարիների ընթացքում նա Իրանի առաջին նախագահն է, որը 2 պետությունների միջև քաղաքական հարաբերությունների դադարեցումից հետո Եգիպտոս է այցելել: