Ադրբեջանում հանդիպումների ժամանակ ԵԽԽՎ Մոնիթորինգային կոմիտեի համազեկուցողներ Թադեուշ Իվինսկին և Պեդրո Ագրամունտը քննարկել են երկրում քաղաքական իրավիճակը նոյեմբերին նախատեսվող խորհրդարանական ընտրություններից առաջ, դատական համակարգի անկախությունն ու ֆունկցիոնալությունը, ինչպես նաև մարդու իրավունքների հետ կապված իրավիճակը: Այս մասին ասվում է ուրբաթ օրը ԵԽԽՎ կայքում մարտի 2-3-ը համազեկուցողների Բաքու այցի արդյունքներով հրապարակված հաղորդագրության մեջ:
Համազեկուցողները հանդիպել են Ադրբեջանի նախագահի, նախագահի վարչակազմի ներկայացուցիչների, խորհրդարանի խոսնակի, խորհրդարանական կոմիտեների նախագահների, ԵԽԽՎ-ում ադրբեջանական պատվիրակության անդամների, գլխավոր դատախազի, արդարադատության նախարարի, Կենտրոնական ընտրական հանձնաժողովի նախագահի, քաղաքացիական հասարակության ներկայացուցիչների հետ:
Համազեկուցողները հանդիպել են նաև ներկայումս նախնական կալանքի տակ գտնվող անձանց փաստաբանների հետ, այցելել են ձերբակալվածների: