Թուրքիայի Չանաքքալե քաղաքի «Մարտի 18» անունը կրող համալսարանի ռեկտոր, հակահայ հայացքներով աչքի ընկնող թուրք փորձագետ Սեդաթ Լաչիները խոսել է Հայոց ցեղասպանության 100-ամյա տարելիցի մասին։ Այս մասին հաղորդում է թուրքական «Անադոլու» լրատվական գործակալությունը։
«Հայերը լրջորեն նախապատրաստվում են 100-ամյա տարելիցին։ Ցեղասպանության վերաբերյալ պնդումները չեն կարող ավարտվել 2015 թվականին։ Ապրիլի 24-ից հետո հայերը չեն հանձնվելու, շարունակելու են իրենց պայքարը 5, 10, 15 տարի, քանի որ մտադիր են ամեն գնով հասնել իրենց նպատակին։
Ցեղասպանության մասին հայերը սկսել են բարձրաձայնել 1965 թվականից սկսած, երբ նշվում էր այդ իրադարձությունների 50-ամյա տարելիցը։ Դրանից 5-10 տարի անց սկսվեց հայկական ահաբեկչությունը (նկատի ունի «Հայաստանի ազատագրության հայ գաղտնի բանակը» (ԱՍԱԼԱ).- խմբ.), որը մինչ օրս շարունակվում է»,- ասել է Լաչիները։
Նա նշել է, որ Հայոց ցեղասպանության 100-ամյա տարելիցը ինչ-որ նոր բանի սկիզբ կարող է դառնալ։ Նրան անհանգստացնում է այն հանգամանքը, որ հայերը, որոնք այս տարի աշխարհի տարբեր երկրներում Ցեղասպանության վերաբերյալ զանազան միջոցառումներ են անցկացնում, ֆիլմեր նկարահանում, գրքեր հրատարակում, ակտիվ գործունեություն ծավալում, կարող են փոխել իրենց մարտավարությունը։
Նշենք, որ Սեդաթ Լաչիները հայ-թուրքական հարաբերություններով զբաղվող հայտնի թուրք փորձագետ է։ Այս թեմայի շուրջ մի քանի գրքեր է հեղինակել՝ «Հայկական հարցը, Սփյուռքը և Թուրքիայի արտաքին քաղաքականությունը», «Թուրքերն ու հայերը. միջազգային հարաբերությունների հետազոտություն», «Հայկական հարցի տեղեկատու» և այլն։
Պատրաստեց՝ Մխիթար Հայրապետյանը
