Պակիստանում երեխաների պոլիոմելիտի պատվաստումներից հրաժարված 500 մարդ է ձերբակալվել: Սա առաջին դեպքն է, երբ երկրի կառավարությունը նման միջոցների է դիմում, հաղորդում է DPA գործակալությունը՝ հղում կատարելով տեղական իշխանություններին:
Ձերբակալություններն իրականացվել են Փեշավար քաղաքում և դրան հարող տարածքներում տարածաշրջանային պատվաստումների եռօրյա ակցիայի շրջանակներում:
«Մենք ձերբակալել ենք բոլոր այն ծնողներին, ովքեր հրաժարվել են պատվաստել իրենց երեխաներին»,- հայտարարել է տեղի ադմինիստրացիայի ղեկավար Ռաիզ Մեհսուդը: Պակիստանի առողջապահության նախարար Սեյրա Աֆզալ Տարարն ավելացրել է, որ կառավարությունն անհանդուրժողականություն կցուցաբերի բոլոր նրանց նկատմամբ, ովքեր հրաժարվում են պատվաստումներից:
Պատվաստումներից հրաժարվելը պայմանավորված է նրանով, որ երկրում գործող ծայրահեղական խմբավորումները կարծում են, որ միջազգային կազմակերպությունների աշխատակիցների կողմից անցկացվող պատվաստումները որոգայթ են և ուղղված են մուսուլմանների ստերիլիզացմանը:
Պոլիոմիելիտի դեմ պայքարի ընդլայնումն առաջին հերթին կապված է անցած տարի այս հիվանդության կտրուկ աճի հետ՝ 2014թ. հիվանդության 303 դեպք է գրացվել, իսկ 2013թ.՝ ընդամենը՝ 93: Հիվանդների 90%-ից ավելին բնակվում են Աֆղանստանի հետ սահմանակից անհանգիստ բնակավայրերում:
