Մի քանի տասնյակ տաքսիստներ այսօր հավաքվել էին Հանրապետության հրապարակում, մի քանի գծով փակել ճանապարհի երթևեկելի հատվածն ու պահանջում էին վերանայել օրենքում վերջերս իրականացված փոփոխությունները:
Տաքսիստները, մասնավորապես, պնդում էին, որ իրենք չեն կարող ամսական 12 հազար դրամ լիցենզիայի գումար վճարել, մոտ 50 հազար դրամ տալ և հաշվիչ տեղադրել, 2400 դրամ ամեն ամիս վճարել հաշվիչի կապարակնքման համար և դրան զուգահեռ՝ վճարել տուգանքներ ու կարմիր գծերի համար:
«Այսպես անհնար է, մեզ բոլոր կողմերից խեղդում են, էս օրենքով ունքը դզելու փոխարեն՝ աչքն էլ հանեցին, մեր օդերը լրիվ փակել են: Հերիք չեն իրանց՝ խելքից դուրս հորինած վճարները, հիմա էլ բոլոր տեղերում, կանգառներում արգելող նշան են դրել ու չեն թողնում, որ կանգառից մարդ վերցնենք: Բա մենք մեր երեխաներին ո՞նց պահենք»,- վրդովված բողոքեց տաքսիստներից մեկը:
Տաքսիստներին լսելու եկավ տրանսպորտի փոխնախարար Արթուր Առաքելյանը: Հավաքված տաքսիստները փորձում են յուրաքանչյուրը իր ձևով ձևակերպել առկա խնդիրները, ինչը մեծ աղմուկ էր ստեղծում և հնարավորություն չէր տալիս հասկանալ բարձրացվող հարցերը: Փոխնախարարն անընդհատ կրկնում էր, որ հարցերն առարկայական չեն, և խուսափում էր թեկուզ քիչ թե շատ առարկայական հարցերի կոնկրետ պատասխաններ տալ:
Փոխնախարարը միայն նշեց, որ ինքը կողմնակից է, որ օրենքն ընդունված ձևով կիրառվի, և եթե մարդը ծառայություններ է մատուցում, ապա պարտավոր է նաև որոշակի վճարումներ կատարել:
Շուրջ մեկ ժամ տևած բանավեճից հետո փոխնախարարը համաձայնեց 5 տաքսիստի հետ վերադառնալ նախարարություն և հանգիստ, գրավոր տարբերակով հասկանալ խնդիրները ու փորձել լուծումներ տալ։
