Ամերիկյան SpaceX մասնավոր ընկերությունն արձակել է Falcon 9 հրթիռը, որը տիեզերք է բարձրացրել հեռահաղորդակցային 2 արբանյակ: Այս մասին իր թվիթերյան էջում հայտնել է SpaceX-ի գործադիր տնօրեն Իլոն Մասքը:
Երկաստիճան կրիչը մեկնարկել է ԱՄՆ ռազմաօդային ուժերի Ֆլորիդայի բազայից: Արբանյակները մոտ 36.000 կմ բարձրությամբ նպատակային ուղեծրին կհասնեն մի քանի ամիս հետո:
Յուրաքանչյուրը 2 տոննա քաշով սարքերը պատրաստել է ամերիկյան Boeing ընկերությունը բջջային կապի օպերատորների՝ ֆրանսիական Eutelsat-ի և հոնկոնգյան Asia Broadcast Satellite-ի համար: Դրանք առաջին Boeing արբանյակներն են, որոնք բացառապես էլեկտրական շարժիչներ ունեն, ինչը հնարավորություն է տվել նվազեցնել սարքերի քաշը: Սպասվում է, որ արձակված սարքերը կծառայեն մոտ 15 տարի:
