Ռուսաստանի միգրացիոն օրենսդրության փոփոխություններից հետո, պաշտոնական տվյալներով, շուրջ 40 հազար հայ շարունակում է մնալ այդ երկրի «սև ցուցակում»:
Ներման խնդրանքով ուղարկված հազարավոր դիմումներից բավարարվել է մոտ 300-ը, մնացածը շարունակում են մնալ «սև ցուցակում» և Ռուսաստան մուտք գործելու նվազագույնը երեք տարվա արգելք ունեն:
Հայ միգրանտներին չօգնեց անգամ Հայաստանի՝ Եվրասիական տնտեսական միությանն անդամակցումը: Ճիշտ է, Հայաստանի և Ռուսաստանի կառավարությունների միջև մի շարք համաձայնագրեր են ստորագրվել՝ հայ միգրանտներին արտոնություններ տալու համար, սակայն դրանք չեն լուծում արդեն ՌԴ օրենսդրությունը խախտած մեր հայրենակիցների խնդիրը: Նրանցից շատերը ՌԴ միգրացիոն օրենսդրությունը խախտել են անգիտակցաբար, ծանոթ չեն եղել խստացումներին և սահմանված 90-օրյա ժամկետը նույնիսկ մեկ շաբաթով խախտելով՝ հայտնվել են արգելքի տակ:
Ռուսաստանցի իրավապաշտպան Դմիտրի Կովալյովը մեզ հետ զրույցում ասաց, որ այս խնդիրն առնչվում է ոչ միայն հայերին, այլև Ռուսաստան հիմնականում աշխատանքի նպատակով մեկնած այլ երկրների քաղաքացիներին: Նրա խոսքով՝ որպես Եվրասիական տնտեսական միության անդամ հայաստանցի միգրանտներին տրվել է էական նշանակություն ունեցող արտոնություն՝ կապված հաշվառում անցնելու հետ, մնացյալը կարող է լինել ընդամեեը Ռուսաստանի միգրացիոն ծառայության «բարի կամքի դրսևորումը»:
Այս օրերին Հայաստանում շարունակվում են «սև ցուցակում» հայտնված հայաստանցիների բողոքի ակցիաները կառավարության, արտաքին գործերի նախարարության մոտ։ Նրանք խնդրում են, թեկուզ տուգանք վճարելով, իրենց նորից ընձեռել Ռուսաստան մեկնելու հնարավորություն: Նրանցից շատերն արգելքի մասին իմացել են անմիջապես Լարսի անցակետում՝ նորից ՌԴ մեկնելու ժամանակ:
«Առաջին լրատվական»-ի հետ զրույցում Ռուսաստան աշխատանքի նպատակով տարիներ շարունակ մեկնած Արմեն Հարությունյանն ասաց, որ սահմանված ժամկետից ընդամնեը 12 օր է ավելի մնացել Վոլգոգրադում: Հարությունյանն ասում է, թե օրենսդրության խստացման մասին պատկերացում անգամ չի ունեցել և նույնիսկ այդ մասին իմանալուց հետո էլ չի կարծում, թե այնպիսի մեծ հանցանք է գործել, որ չի կարող գնալ Ռուսաստան՝ աշխատելու և ընտանիք պահելու համար. «Ես պատրաստ եմ տուգանք վճարել, բայց այստեղ նույն գործը չեմ կարող անել և այդքան գումար ստանալ: Ճիշտ է, ռուբլին ընկնելուց հետո այն գումարը չէի ստանւմ այլևս, բայց ամեն դեպքում աշխատում ու ընտանիք էի պահում»:
Ի դեպ, Ռուսաստանն արգելք է դրել ոչ միայն այնտեղ աշխատանքի մեկնողների, այլ նաև բուժվելու նպատակով այդ երկիր այցելածների վրա, եթե օրենսդրությունը թեկուզ կարճ ժամանակով խախտել են:
Համլետ Թևոսյանը այնտեղ մի քանի ամիսը մեկ անվճար բուժում է ստանում։ Քանի որ վնասվածք ստացել է գործարանում աշխատելու ժամանակ, ողջ ծախսերը հոգում է այն ընկերությունը, որի հետ նա պայմանագիր է կնքել և աշխատել: ՌԴ մեկնելու 3 տարվա արգելքը նրան ևս դժվար կացության առաջ է կանգնեցրել:
Հավելենք, որ միգրացիոն ծառայության միակ պատասխանը դժվարության առջև հայտնված քաղաքացիներին այն է, որ այդ հարցը բարձրացվել է Ռուսաստանի միգրացիոն ղեկավարության հետ հանդիպումների ընթացքում, բայց խախտվել է օրենքը, և իրենք չեն կարող պնդել, որպեսզի ՌԴ-ն մեր հայրենակիցներին ների։
