«Այսօր առողջության համաշխարհային օրը և մայրության ու գեղեցկության տոնը համընկել են, սակայն, առանց առողջության, գեղեցկության տոնի վրա կարելի է խաչ քաշել»,- այս մասին այսօր հրավիրված ասուլիսի ընթացքում ասաց «Երևան» բժշկական կենտրոնի փոխտնօրեն Բամինե Բաղրամյանը: Նա շեշտեց, որ մեզանում տարածված խնդիրների պատճառներից մեկը դիմելիության բացակայությունն է: Նրա խոսքերով, եթե օրգանիզմի ինչ-որ մասը խանգարվում է, դա տարածվում է ամբողջ օրգանիզմի վրա, քանի որ մարդը ամբողջական մարմին է: «Շատ կարևոր է պրոֆիլակտիկ բուժումը: Ինչքան էլ մարդիկ բժիշկներին չհավատան,- ինչը երբեմն արդարացված է,- դա չի կարող պատճառ դառնալ, որ չդիմեն բժշկի ու անտեսեն իրենց առողջությունը: Առողջ օրգանիզմի չբուժված մեկ հիվանդությունը կարող է 10 հիվանդության պատճառ դառնալ: Օրինակ՝ ճարպակալումից առաջանում է շաքարային հիվանդություն, դրանից էլ՝ սրտային հիվանդություն և այլն»,- ահազանգեց Բ. Բաղրամյանը:
