Իտալացի քաղաքական գործիչ Ֆեդերիկա Մացցոնին հագուստ արտադրող Shoeshine ապրանքանիշին մեղադրել է սեքսիզմի մեջ, երբ իր որդու հագուստի ներսի կողմում պիտակ է հայտնաբերել, որի վրա բացի լվացքի վերաբերյալ ցուցումներից՝ գրված է եղել. «Այն տուր մայրիկիդ, դա նրա գործն է»: Այս մասին հայտնում է russian.rt.com-ը:
Ըստ Մացցոնիի՝ նման վերաբերմունքը վիրավորական է ոչ միայն կանանց համար, ովքեր, իբր, զբաղվում են միայն տնային գործերով, այլև տղամարդկանց համար, որոնց ներկայացնում են իբրև այդպիսի պարզ բաներ անելու անընդունակ: Սակայն ներկայացուցիչը հավաստիացրել է, որ դա կատակ է եղել՝ կենտրոնացած դեռահասների վրա և չի ենթադրել որևէ մեկի իրավունքների խախտում:
Երբ քաղաքական գործիչն իր գտածի մասին գրել է Facebook-ում, որոշ օգտատերեր նույնիսկ կոչ են արել բոյկոտել ապրանքանիշը: Սակայն նրանց ընդդիմադիրները նշել են, որ ոչ մի սխալ բան չկա մորն օգնության համար դիմելու մեջ, եթե նա ավելի լավ գիտի՝ ինչ անել տվյալ իրավիճակում:
