ԱԺ հասարակայնության հետ կապերի և լրատվության վարչության պետ Արսեն Բաբայանը Facebook-ի իր էջում վերլուծել է ՀՀ առաջին նախագահ Լևոն Տեր-Պետրոսյանի «Սրտիս պարտքը» հոդվածը՝ շեշտելով, որ ինքը դա անում է որպես ՀՀ քաղաքացի:
«Նախ ասեմ, որ արժանի էր ընթերցման առաջին նախագահի այս «պարտքը»։ Բայց, երբ արդեն հասել էի երկրորդ պարբերությանը, տեսնում էի, որ այս ելույթը կավարտվի քաղաքականությունից դուրս գալու հայտարարությամբ։ Որքան առաջ ես գնում տեքստում, այնքան ավելի ես համոզվում դրանում։ Ի զարմանս ինձ այդպես էլ չգտա այս ելույթի տրամաբանական ավարտը։ Այս ելույթում դրա տրամաբանական ավարտ (լքում եմ քաղաքական դաշտը) չլինելը ստիպեց ամբողջությամբ համաձայնվել Տիգրան Քոչարյանի վերջին գրառմանը, ըստ որի՝ «եթե առաջին նախագահը պատվանդանից գլուխը կախի, ապա դրա վրա կկարդա քաղաքական գործչի մահվան տարեթիվը»։ Այո, իսկապես այսօր, այս ելույթ «պարտքով», առաջին նախագահը հաստատեց, որ ունի քաղաքական գերեզման»,- գրում է Բաբայանը և հավելում.
«Հաջորդ հանգամանքը, որ ուշադրությունս գրավեց, «Բարգավաճ Հայաստան» կուսակցության ներսում առկա փոքր խմբակի մասին է, որն, ըստ Լևոն Տեր-Պետրոսյանի, այդ կուսակցության համար չարիքներից մեծագույնն է։ Իսկ ո՞վ չի հասկանում, որ Նախագահ Սերժ Սարգսյանը ՀՀԿ նիստի ելույթում հենց այդ խմբակին էր ակնարկում։ Խմբակ, որ իրենց ամբիցիաներով ու առանձին շահերով ելույթներ են պատրաստում, որն էլ Ծառուկյանն է ընթերցում։ Ո՞վ չի հասկանում, որ հենց այդ ելույթներն են, որ անմիջապես (երևի դեռ չընթերցած), անգամ «7 օր» ու «ժամ» չանցած տեղ են գտնում այդ խմբակին սպասարկող, նույնիսկ այդ խմբակով կառավարվող լրատվական կայքերում։ Վստահ եմ, որ բոլորս ենք հասկանում։ Եվ ուրեմն, ո՞վ է հիմնական մեղավորը, որ ունենք այն, ինչ ունենք»։
