«Առաջին լրատվական»-ի զրուցակիցն է «Ազատամարտիկների դաշինքի» անդամ Սուրեն Սարգսյանը:
– Պարոն Սարգսյան, տեղեկություններ կային, որ չնայած «Բարգավաճ Հայաստանի» որոշմանը՝ փետրվարի 20-ի հանրահավաքը չեղյալ հայտարարելու մասին, ազատամարտիկները միևնույն է՝ այդ օրը կգնան հրապարակ: Ձեր տարածած հայտարարությունը՝ հրապարակում հավաքվել ոչ թե փետրվարի 20-ին, այլ մարտի մեկին, կարո՞ղ ենք նահանջ համարել:
– Նահանջի խնդիր չկա, մենք հայտարարել էինք, որ ժողովրդի կողքին ենք լինելու: Կուսակցություններից մեկը հայտարարել է, որ կլինի հրապարակում, մյուսը՝ «Բարգավաճը», ասեց, որ օրինական չէ, չեն ուզում արյուն թափել, այսինքն՝ ռեսուրսներ, մարդկանց բերելու խնդիր կար… ՀԱԿ-ը հայտարարեց, որ օրինական արտոնված հանրահավաքն ամսի մեկին է, և իրենք կտան բոլոր հարցերի պատասխանը: Բնականաբար, մենք այդ տրամաբանության մեջ որոշեցինք, որ այդ օրը կգնանք և կտեսնենք, թե ինչ են ասում: Ամբողջ խնդիրը դրանում էր:
– Ազատամարտիկները վստահում էին այդ քաղաքական ուժերին, որոշակի հույսեր կապում, որ նման խոշոր ռեսուրսներ ունեցող կուսակցությունը կօգնի հասնել հաջողության: «Բարգավաճ Հայաստանի» հայտարարությունից և, կարելի է ասել, հետքայլից հիասթափություն կա՞:
– Ե՛վ Գագիկ Ծառուկյանի, և՛ Լևոն Տեր-Պետրոսյանի, և՛Րաֆֆի Հովհաննիսյանի հետ մենք արտոնել ենք մեր վարչության անդամներին, որ հանդիպեն: Գագիկ Ծառուկյանն իր ռեսուրսներով՝ սկսած գրասենյակներ բացելուց, ավելի մեծ հնարավորություններ ունի։ Ինչ խոսք՝ վատ չէ, երբ կան այդ հնարավորությունները: Հիմա Գագիկ Ծառուկյանը որոշեց, որ այլևս չի զբաղվելու… կամ ինչպես դուք եք ասում՝ նահանջեց. դա իր խնդիրն է: Գագիկ Ծառուկյանի որոշումը մեզ չի կարող հիասթափեցնել: Մենք ցավում ենք, որ մեր երկրում հիմա այսպիսի իրավիճակ է:
Իմ կարծիքով՝ քաղաքական կուսակցությունները պետք է ազնիվ լինեն և ժողովրդին հայտարարեն, որ իշխանափոխության հասնելու համար Հայաստանի Հանրապետությունում սահմանադրական ճանապարհը փակ է: Ընդդիմադիր կուսակցությունները պետք է հանդես գան համատեղ հայտարարությամբ՝ վկայակոչեն այն ճնշումները, որ կիրառեցին կոնկրետ կուսակցության նկատմամբ, ասեն, որ Սահմանադրության ճանապարհով իշխանափոխության հարցն այլևս փակ է, պետք է մտորել, մտմտալ իշխանափոխության հասնելու այլ տարբերակներ: Մենք գործ ունենք հանցախմբի հետ:
Ինչ վերաբերում է ազատամարտիկներին, ապա մենք ժողովրդի կողքին ենք, մենք պատրաստ ենք ժողովրդի վստահությունը ստանալով՝ մեր երկրում իրականացնել իշխանափոխություն:
– Բավական չէ՞ առհասարակ կուսակցություններին հավատալ: Անընդհատ ժողովրդին խոստումներ են տալիս ու համագործակցության գնում: Նույն Ծառուկյանն էլ ժողովրդին հույս ներշնչեց և կարելի է ասել՝ համագործակցության գնաց:
– Ես ասում եմ՝ Հայաստանի Հանրապետության ընդդիմադիր կոչվող քաղաքական կուսակցությունները պետք է ունենան ազնվություն ու հայտարարեն, որ այստեղ իշխում է հանցախումբ, և որ այստեղ սահմանադրական ճանապարհ չկա իշխանափոխություն իրականացնելու համար։ Հենց որ նրանք ունենան ազնվություն՝ դա անելու, հավատն էլ կլինի: Կարծում եմ՝ այս պահին հավատը խիստ սասանված է, ժողովուրդն էլ՝ բարոյալքված վիճակում: Չկա մեկը, մի կուսակցություն, որը պատրաստ լինի անձնազոհության:
– Դուք ի՞նչ պատասխաններ կամ բացատրություն եք ակնկալում ստանալ մարտի մեկին:
– Ես չգիտեմ: Ես սպասում եմ իմ նշած հայտարարությանը: Եթե որևէ կուսակցություն կասի, որ դեռ քաղաքական ճանապարհ կա իշխանափոխության հասնելու համար՝ ես դա բարոյական ու պարկեշտ չեմ համարի:
Լուսանկարը՝ armtimes.com
