Թեև կիսում ենք բարի մղումը, սակայն ունենք խիստ մտավախություններ` հետևանքների վերաբերյալ: Այսպես արտահայտվեց ՀՀ ֆինանսների նախարար Վաչե Գաբրիելյանը Ազգային ժողովի պատգամավորներ Վահան Հովհաննիսյանի, Լիլիթ Գալստյանի, Արմեն Ռուստամյանի, Արծվիկ Մինասյանի, Բագրատ Սարգսյանի, Ռուզաննա Առաքելյանի և Արա Նռանյանի ներկայացրած ««Նվազագույն ամսական աշխատավարձի մասին» ՀՀ օրենքում փոփոխություններ և լրացում կատարելու մասին» և ««Եկամտահարկի մասին» ՀՀ օրենքում փոփոխություն կատարելու մասին» օրենքների նախագծերի փաթեթի վերաբերյալ:
Այդ նախաձեռնությամբ առաջարկվում է նվազագույն աշխատավարձ սահմանել կա՛մ 40,234 դրամը (նվազագույն սպառողական զամբյուղ), կա՛մ էլ 51,356 դրամը (միջին ամսական աշխատավարձի 50 տոկոսը):
«Օրենսդրական նախաձեռնության ընդունման արդյունքում կառաջանա լրացուցիչ 62.9 մլրդ դրամի պահանջ` նվազագույն սպառողական զամբյուղի հաշվարկով առաջնորդվելու դեպքում և 153.4 մլրդ դրամ` միջին ամսական աշխատավարձի 50 տոկոսի դեպքում:
Ընդ որում, Եկամտահարկի և սոցիալական ապահովության վճարների գծով, հաշվի առնելով տնտեսությունում աշխատավարձերի բաշխվածությունն ըստ դեցիլային միջակայքերի, ևս առաջ են գալու կորուստներ` համապատասխանաբար 2.5 և 6.0 մլրդ դրամ: Դա նշանակում է 2011թ-ի համար ծրագրված պակասուրդի աճ 44 տոկոսով` առաջին դեպքում և կրկնակի աճ` երկրորդ դեպքում: Արդյունքում ունենալու ենք պահանջարկի աճով պայմանավորված գների լրացուցիչ զգալի աճ»,- ասաց ՀՀ Էկոնոմիկայի նախարար Վաչե Գաբրիելյանը` հավելելով, որ այս նախագիծը ենթադրում է լրացուցիչ գնաճ` 5-8 տոկոսային կետով:
Արդյունքում կառավարությունը որոշեց դեմ արտահայտվել օրենքների այս նախագծերի փաթեթի ընդունմանը: