Wellcome Collection թանգարանը ձեռք է բերել լոնդոնյան մարմնավաճառների 1787 և 1788 թթ. թողարկված կատալոգը, հայտնում է The Guardian-ը: Harris’s List of Covent Garden Ladies վերնագրով երկու գրքում նշված են Քովենթ-Գարդեն ժամանցային շրջանում աշխատող կանանց անունները կամ ծածկանունները, հասցեներն ու գները: Հեղինակն անհայտ է: Հրատարակությունները տեղ կգտնեն թանգարանի հատուկ բաժնում:
The Guardian-ը նշում է, որ կատալոգն առաջին անգամ հրապարակվել է 1757 թ. և մոտ 30 տարի ամեն տարի թարմացվել է: Պատմաբանները ենթադրում են, որ Մեծ Բրիտանիայում և դրա սահմաններից դուրս կարող էր տարածված լինել գրքի մոտ 250 000 օրինակ: ցուցակի որոշ կետեր պարզաբանումներ են պարունակում: Օրինակ՝ մի կնոջ անվան դիմաց գրված է, որ նա կարողանում է ֆլեյտա նվագել:
Փորձագետները նշում են, որ XVIII դ. երկրորդ կեսին գիրքը շատ տարածված է եղել:
Թերթը նշում է, որ 2 գրքերը դեռ չեն դրվի բաց ցուցադրության՝ ապահովության նկատառումներով: Կատալոգը տեսնել ցանկացողները պետք է հատուկ հայտ ուղարկեն թանգարան: Սակայն ցուցակը թվայնացվել է և հնարավոր է տեսնել Wellcome Library գրադարանի կայքում:
Քովենթ-Գարդենը շրջան է Լոնդոնի կենտրոնում՝ թափառող արտիստներով, թատրոններով և զվարճանքի կենտրոններով: Ավելի վաղ այնտեղ է եղել քաղաքի հասարակաց տների մեծ մասը:
