Թուրք հոդվածագիր Ֆյուսուն Էրդողանը «Ցեղասպանության 100-րդ տարելիցին ընդառաջ ներողության մի պարտք ունենք» հոդվածում անդրադառնում է Թուրքիայում մահապատժի ենթարկված Լևոն Էքմեքչյանին և Թուրքիայի առաջադեմ ձախերի շրջանում նրա հիշատակը հավուր պատշաճի չհարգելու իրողությանը: Հոդվածագիրը կոչ է անում Հայոց ցեղասպանության 100-րդ տարելիցին ընդառաջ հիշել ու հարգել նաև Էքմեքչյանի հիշատակը:
Հոդվածագիրը նշում է, որ Էքմեքչյանը ևս հեղափոխական էր, հայ հեղափոխական, որին, սակայն, Թուրքիայի առաջադեմ ձախերն ու հեղափոխականները չեն ցանկանում հիշել, հիշատակել նրան՝ ի թիվս այլ հեղափոխականների, ովքեր տասնամյակներ շարունակ սպանվել կամ հալածանքների են ենթարկվել թուրքական պետության կողմից:
Հոդվածագիրը նշում է, թե ցուցակներում, որտեղ նշված են այն հեղափոխականների, ձախերի, առաջադեմ գործիչների անունները, ովքեր սպանվել են 1980 թվականի ռազմական հեղաշրջումից հետո, չկա Լևոն Էքմեքչյանի անունը, թեև նա նույնպես նույն ռեժիմի կողմից դաժանագույն կտտանքների է ենթարկվել, ապա նաև մահապատժի ենթարկվել: Նա նշում է, թե Թուրքիայի առաջադեմ հատվածը չի հիշում Թուրքիայում սպանված Էքմեքչյանին ոչ Հայոց ցեղասպանության, ոչ էլ 1980 թվականի ռազմական հեղաշրջման շրջանակներում:
Ֆյուսուն Էրդողանն իր հոդվածի վերջում կոչ է անում Էքմեքչյանի հանդեպ առաջադեմ շրջանակների անուշադրության և բացթողումների համար ներողություն խնդրել նրա ազգականներից ու հարազատներից:
Նշենք, որ Լևոն Էքմեքչյանը ԱՍԱԼԱ-ի (Հայաստանի ազատագրության հայ գաղտնի բանակի) մարտիկ է եղել, ով մասնակցել է հայկական կազմակերպության՝ 1982 թվականին Անկարայի Էսենբողա օդանավակայանում իրականացված գործողությանը: Վերջինս թուրքական ուժերի հետ փոխհրաձգության ժամանակ ծանր վիրավորվել է և գերի ընկել: Թուրքական բանտում դաժան տանջանքներից հետո 1983 թվականին հայ մարտիկը մահապատժի է ենթարկվել. նրան կախել են Անկարայի բանտերից մեկում, ապա թաղել բանտի գերեզմանատանը՝ առանց շիրմաքարի: Թուրքիան վերջին տարիներին տևական ժամանակ չէր թույլատրում անգամ Էքմեքչյանի մասունքները տեղափոխել Ֆրանսիա, որտեղ ապրում է նրա ընտանիքը:
