Եգիպտոսի նախագահ Մուհամադ Մուրսին չեղյալ է հայտարարել, որպես պետության ղեկավար, իր առաջին այցը Ֆրանսիա, որը ծրագրված էր այս շաբաթվա վերջին: Այս մասին հայտարարել է պետության ղեկավարի վարչակազմի պաշտոնական ներկայացուցիչ Յասիր Ալին,- փոխանցում է RIA Novosti-ն:
Մուրսին պետք է երկու օրով Գերմանիա այցելեր, որից հետո ուղևորվեր Ֆրանսիա: Այցը Գերմանիա, որը նախատեսված է հունվարի 30-ին, կիրականացվի, սակայն Մուրսիի գտնվելն այնտեղ կսահմանափակվի մի քանի ժամով:
Յասիր Ալին նշել է, որ, չնայած կրճատված գրաֆիկին, Մուրսին կհանդիպի Գերմանիայի կանցլեր Անգելա Մերկելի հետ և ելույթ կունենա գերմանացի ու եգիպտացի գործարարների ակումբում, որտեղ հրավիրված են գործարար խավի շուրջ 300 ներկայացուցիչներ:
Ծրագրի նման փոփոխությունները պայմանավորված են Եգիպտոսում իրադրության սրմամբ:
Երկրի տարբեր քաղաքներում անկարգություններ են, որոնք արդեն մի քանի տասնյակ մարդու կյանք են խլել: ՊորտՍաիդ, Սուեզ և Իսմայիլի նահանգներում 30-օրյա արտակարգ դրության ռեժիմ է սահմանվել, շրջկենտրոններում՝ պարետային ժամ:
Հիշեցնենք, որ անկարգությունների ալիքը բռնկվել է ուրբաթ՝ 2012-ի սկզբին ֆուտբոլային մարզադաշտում տեղի ունեցած ծեծկռտուքի գործով անցնող 21 ամբաստանյալների դեմ մահվան դատավճռի կայացումից հետո:
