Հունվարի 29-ը կարելի է համարել ավտոմեքենայի պաշտոնական ծննդյան օրը։ 1886-ին Կարլ Ֆրիդրիխ Բենցը ներքին այրման շարժիչով (ՆԱՇ) առաջին ավտոմեքենայի արտոնագիրը ստացավ։
ՆԱՇ-ի համար արտոնագիր դեռ 1876-ին տրվել էր Նիկոլաս Ավգուստին Օտտոյին։ Այդ ժամանակվանից սկսած՝ շատ ինժեներներ փորձել են դրա հիման վրա ստեղծել ավելի ժամանակակից մեքենա։ Նրանցից մեկը Բենցն էր, ով 1885-ին կառուցեց բարձր ճաղանիվներով երկտեղանի ավտոմոբիլ։ Մեքենան կշռում էր 250 կգ, շարժիչը Բենցի կողմից նոր մշակման ենթարկված տարբերակով էր։ Բենզիով աշխատող քառատակտ ագրեգատն ուներ ջրով հովացվող համակարգ, հզորությունը 0,9 ձիաուժ էր։
Բնականաբար, մեքենան կատարյալ չէր, այն աղմկոտ էր և մի միջադեպի հետևանքով ուղարկվեց վերակազմավորման։ Տեղական քաղքենիներին ներկայացնելուց հետո մեքենայի աղմուկը վախեցրել էր մսավաճառի ձիուն, որը տարվող բեռը թափել էր ճանապարհին։ Բենցը ստիպված լինելով դրամական հատուցում տալ փչացած ապրանքի համար՝ որոշեց կատարելագործել մեքենան։
Բազմաթիվ փորձարկումներից հետո 1886-ի հունվարի 29-ին նա ստացավ № 37435 արտանագիրը՝ «բենզաշարժիչով ընթացող տրանսպորտային միջոցի» համար։ Մեքնան կոչվեց Benz Patent-Motorwagen։ Ավտոմեքենայի համաշխարհային անդրանիկ ցուցադրումը կատարվեց 1887-ին՝ Փարիզում։
19-րդ դարի ինժեներական մտքի առադեմ մտահղացումը զարգացնում էր մինչև 16 կմ/ժ արագություն. անհավանական երևույթ այն ժամանակների համար։ Մեքենան աչքի էր ընկնում շատ նորույթներով, որոնցից մեկը էլեկտրական բռնկում էր։
Մեքենան կորող էր երկար ճանապարհ անցնել. ևս մեկ նորամուծություն 19-րդ դարի համար։ Ավտոմոբիլաշինության պատմության մեջ առաջին անգամ գրանցվել է 180 կմ հեռահարությամբ ավտովազք։
Մեքենան, սակայն, դեռ բավականին աղմկոտ էր, ձայնի խլացնող հարմարանքն ավելի ուշ են հայտնագործել։
Գեղեցկուհի Բերտա Ռինգենտը, ով Բենցի կինն էր, շատ էր սիրում ամուսնու մեքենան և մի անգամ «գողացավ» այն։ Ավտոմեքենաների պատմության այդ առաջին գողությունը շրջադարձային եղավ մեքենայի համար։
Բերտայի համար մեքնան վարելը շատ դժվարություններ էր ստեղծել՝ թափվել էր բենզինը, պոկվել էին ինչ–որ մասեր։ Այն ժամանակ ավտոմեքենայի վերանորոգման արհեստանոցներ չկային, և Բենցի կնոջ «գողությունը» բոլորովին էլ սուր սյուժեով ժամանակակից ֆիլմ չէր հիշեցնում։
Համարվում է, որ այս գողությունից հետո մեքենան հայտնի է դարձել ամբողջ Գերմանիայում, և ճանաչում է բերել արտադրող Motorwagen ընկերությանը և Բենցին։
1926-ին Կարլ Բենցի և Գոթլիբ Դայմլերի ընկերությունները միավորվել են։ Վերջինս ՆԱՇ-ի գյուտարարն է։ Միավորված ձեռնարկությունը դառնում է աշխարհի խոշորագույն ավտոարտադրողը, գործարաններ է հիմնում աշխարհի տարբեր ծայրերում։
Ժամանակակից Daimler-ը մտադիր է մշակել ջերմային տարրերով գարծարկվող ավտոմոբիլներ։ Կոնցեռնն այդ ուղղությամբ համագործակցում է համաշխարհային խոշոր ավտոարտադրողների հետ։
