Այն, որ հասարակական կարծիքի ուսումնասիրման «Գելլափ» կազմակերպության հարցումներում նախագահի թեկնածու Վարդան Սեդրակյանը վերջին տեղում է՝ 0,1 տոկոս ձայնով, դա նրան չի անհանգստացնում. ընդհակառակը: «Դա ինձ ուրախացնում է, որովհետև այն միայն պրոիշխանական կառույց է: Իմ կարգախոսն է «Վերևում Աստված կա», մենք քրիստոնյա ենք և պաշտում ենք Հիսուս Քրիստոսին, իսկ նա ասում էր՝ առաջինները վերջին կդառնան, վերջինները՝ առաջին: Այնպես որ ինձ համար խիստ վիրավորական կլիներ, որ «Գելլափը» նկարեր մեծ տոկոսներ»,- «Կենտրոն» հեռուստաընկերության «Ուրվագիծ» հաղորդման եթերում ասել է Վարդան Սեդրակյանը:
Էպոսագետ թեկնածուն ասել է, որ ինքը միակ թեկնածուն է, որ հստակ խոսել է արտաքին քաղաքականությունից. «Եվրամիություն և ԵվրԱզԷս հարաբերություններում ես ընտրում եմ Եվրասիական միությունը: Ես նշել եմ, որ կարևորագույն քաղաքական վեկտորներց մեկը լինելու է հայ-իրանական քաղաքական և ռազմական պայմանագրի ստեղծումը: Հաշվի առնելով հայ-ռուսական և հայ-իրանական պայմանագիրը՝ Հայաստանը ստեղծելու է դաշինք»:
Թեկնածուն երեկոյան բազմոցին նստած հետևում է քարոզարշավը և տպավորություն ստանում, թե քաղծառայության մրցույթ է, բոլոր թեկնածուները «խոսում են տնտեսականից»: «Ես եկել եմ ոչ կենցաղային խնդիրները առաջ տանելու համար: Ես եկել եմ մտածելու, որ վաղը, եթե ԱՄՆ-ը հարձակվեց Իրանի վրա, ինչ է լինելու մեզ հետ. եթե Իրանի ոչնչացումից հետո Ադրբեջանը Հայաստանի վրա հարձակվի, Վրաստանը ում վրա կգնա»,- ասել է ռուսամետ թեկնածուն՝ նշելով, որ Ռուսաստանի հետ մենք կստեղծենք սահման՝ Ադրբեջանում կորցրած մեր քաղաքները հետ վերադարձնելու ճանապարհով:
Վարդան Սեդրակյանը հույս ունի, որ որևէ դաշինքից միավորման առաջարկ չի ստանա, ոչ էլ սատարելու կոչ կլսի, քանի որ չի ուզում էպոսի գաղափարախոսությունը նյութական գաղափարախոսության հետ միավորել: «Ես չեմ հանդիպում արտերկրի դեսպանի հետ և, բնականաբար, պետք է վերջին տեղում լինեմ: Բայց ես կլինեմ նախագահ»,- ասել է նախագահի թեկնածուն:
