«Սառը պատերազմը» պատմություն է, բայց անցած հանգստյան օրերին դրա ոգին թևածում էր Մյունխենում անվտանգության կոնֆերանսի ժամանակ, գրում է The New York Times-ը: Թերթը նշում է, որ Գերմանիայի կանցլեր Անգելա Մերկելը և ամերիկացի սենատոր Ջոն Մաքեյնը շատ տարբեր դասեր են քաղել XX դարում ԽՍՀՄ-ի հետ Արևմուտքի հակամարտությունից, ինչի մասին վկայում է նրանց վեճը Կիևին ռազմական օգնության հարցում: Այդ հարցում տարաձայնություններն առավել լուրջ «պառակտումներից են» Մոսկվայի ներկայիս «մարտահրավերին» արևմտյան դաշնակիցների արձագանքի վերաբերյալ քննարկման մեջ, ասվում է հոդվածում:
Այսօրվա Եվրոպան շատ է տարբերվում այն օրերից, երբ ՆԱՏՕ-ի և խորհրդային բլոկի երկրների զինվորականները «հայացքների մենամարտ» էին վարում, բայց ուկրաինական ճգնաժամը վերադարձրեց վերաբերմունքի «ծանոթ տարբերությունները» այն հարցում՝ արդյոք ուժի կիրառման սպառնալիքը (տվյալ դեպքում՝ Կիևին ռազմական օգնություն ցուցաբերելու ԱՄՆ-ի պատրաստակամությունը) ավելի արդյունավե՞տ է, քան չհաջողված բանակցությունների ամիսները, գրում է պարբերականը: Միաժամանակ, թերթն ընդգծում է, որ բոլորն այն կարծիքին են, որ նախընտրելի ելքը բանակցությունների ընթացքում ձեռք բերված որոշումն է:
Պարբերականը հիշեցնում է Մերկելի և ԱՄՆ նախագահ Բարաք Օբամայի բանակցությունների մասին, որը, ինչպես հաղորդվում է, դեռ որոշում չի ընդունել Ուկրաինային ռազմական օգնության մասին, երեքշաբթի օրը դիվանագետները կհանդիպեն բանակցելու Բեռլինում, իսկ չորեքշաբթի օրը սպասվում է Միսնկում Ռուսաստանի, Գերմանիայի, Ֆրանսիայի և Ուկրաինայի ղեկավարների հանդիպումը:
Հույզերը հազվադեպ են միջազգային դիվանագիտության մեջ, սակայն անցած հանստյան օրերին հույզեր առկա էին և՛ անձնական, և՛ հրապարակային խոսակցություններում, նշում է թերթը:
